У кіраўніка Пентагона выявілі рак прастаты
У міністра абароны ЗША Лойда Осціна дыягнаставалі рак прастаты. З-за ўскладненняў пасля аперацыі кіраўніка Пентагона ў пачатку года тэрмінова шпіталізавалі, паведамляюць амерыканскія СМІ.
09.01.2024 / 23:53
Лойд Осцін. Фота: Michael Probst / AP
Паводле заявы шпіталя, медагляд у пачатку снежня 2023 года выявіў у Осціна рак прастаты на ранняй стадыі. Аперацыя прайшла пад агульным наркозам 22 снежня, а на наступны дзень кіраўнік Пентагона быў выпісаны з бальніцы.
Аднак ужо 1 студзеня Осціна зноў шпіталізавалі з моцным болем у жываце, які стаў вынікам ускладненняў аперацыі. Першаснае абследаванне выявіла інфекцыю мочавыводзячых шляхоў.
«2 студзеня было прынята рашэнне перавесці яго ў аддзяленне інтэнсіўнай тэрапіі для пільнага назірання і больш высокага ўзроўню догляду. Далейшае абследаванне выявіла скапленне вадкасці ў брушной поласці, што парушыла працу тонкага кішачніка», — дадалі ў бальніцы.
Таксама там падкрэслілі, што з 1 студзеня міністр абароны ЗША ні разу не страціў прытомнасць і не быў пад наркозам. Цяпер пасляаперацыйныя ўскладненні ўдалося ліквідаваць і Осцін працягвае папраўляцца, гаворыцца ў паведамленні.
Чытайце таксама:
Пентагон тры дні не паведамляў Беламу дому аб шпіталізацыі свайго кіраўніка
У Кіеў «з пасланнем» прыбыў кіраўнік Пентагона
Рэспубліканцы прапануюць знізіць заробак кіраўніку Пентагона да аднаго даляра