Гарадзенца асудзілі за ўдзел у Маршы ў 2020-м. Ён кажа, што думаў, што шэсце адбываецца ў падтрымку Лукашэнкі
Слесару Мікіту Машуту паводле ч. 1 арт. 342 КК далі два гады «хіміі». Гарадзенец віну не прызнаў і запэўніваў суд, што думаў, што шэсце, у якім ён браў удзел, адбываецца ў падтрымку Лукашэнкі. Пры гэтым пры сабе ў яго быў бел-чырвона-белы сцяг.
15.01.2024 / 12:09
Фота: Tut.by
Гэта было шэсце ў жніўні 2020 года, якое рухалася ад Савецкай плошчы да міні-рынку «Прынёманскага» па праспекце Янкі Купалы ў Гродне, піша «Вясна».
Машута віны не прызнаў. Ён распавёў, што прыехаў на Савецкую плошчу, каб пайсці ў краму. Там убачыў вялікую колькасць людзей, у якіх пры сабе мелася бел-чырвона-белая атрыбутыка і чырвона-зялёная.
Ён вырашыў, што гэта мерапрыемства ў падтрымку Аляксандра Лукашэнкі, далучыўся да натоўпу і прыняў удзел у вулічным шэсці.
Рухаючыся ў бок праспекта Янкі Купалы зразумеў, што ўдзельнікамі масавага мерапрыемства з'яўляюцца пратэстоўцы, аднак працягнуў супольны рух у калоне грамадзян, выкрыкваў лозунгі, мяркуючы, што яго дзеянні з'яўляюцца правамернымі.
Паблізу міні-рынку «Прынёманскага» пачуў ад супрацоўнікаў міліцыі, што мерапрыемства з'яўляецца несанкцыянаваным, таму пакінуў яго.
Разам з тым з матэрыялаў справы стала вядома, што ў яго быў бел-чырвона-белы сцяг.
У выніку суддзя Маргарыта Ланцэвіч прызначыла гарадзенцу два гады «хіміі». Пасля абвяшчэння прысуду Мікіту вызвалілі ў зале суда, аднак да суда ён быў пад вартай.