Załužny paćvierdziŭ źbićcio rasijskich zvyškaštoŭnych samalotaŭ nad Azoŭskim moram
Hałoŭnakamandujučy ŭkrainskaj armijaj hienierał Valer Załužny paviedamiŭ, što ŭkraincy źbili DRŁV A-50 i Ił-22M.
15.01.2024 / 12:46
Samalot dalokaha radyjołakacyjnaha vyjaŭleńnia i kiravańnia A-50.
«Voiny Pavietranych sił Uzbrojenych sił Ukrainy źniščyli varožy samalot dalokaha radyjołakacyjnaha vyjaŭleńnia A-50 i pavietrany punkt kiravańnia praciŭnika Ił-22.
Dziakuj pavietranym siłam za vydatna spłanavanuju i praviedzienuju apieracyju ŭ Pryazoŭi! Słava Ukrainie!» — napisaŭ u svaim telehram-kanale Załužny.
Samalot DRŁV A-50 — unikalny, takich na ŭzbrajeńni ŭ Rasii nie bolš za dzieviać, ale nie ŭsie jany bajazdolnyja. Košt takoha samalota bolš za 300 miljonaŭ dalaraŭ. A-50 — asnoŭny dla ŭkazańniaŭ pa naniasieńni rakietnych udaraŭ pa terytoryi Ukrainy.
Mienavita pa DRŁV A-50 u lutym 2023 hoda byŭ naniesieny ŭdar dronam na biełaruskim aeradromie «Mačuliščy».
Na zdymku IŁ-20, jaki vizualna padobny da IŁ-22. Fota: TASS
Nie mienš unikalny i samalot Ił-22M — «pavietrany abaronieny punkt kiravańnia». Pad «abaronienaściu» majecca na ŭvazie ŭstojlivaść kanałaŭ suviazi da ŭździejańnia srodkaŭ radyjoelektronnaj baraćby.
Hety samalot źjaŭlajecca pavietranym kamandnym punktam, ź jakoha možna kiravać vojskami padčas bajavych dziejańniaŭ. Pakolki hety punkt znachodzicca ŭ pavietry, to jaho niemahčyma źbić apieratyŭna-taktyčnymi rakietami.