Piaskoŭ: Pucin moža naviedać KNDR u najbližejšy čas
Terminy pajezdki buduć uzhadniacca pa dypłamatyčnych kanałach.
15.01.2024 / 13:58
Uładzimir Pucin i Kim Čen Yn padčas sustrečy na Dalokim Uschodzie 14 vieraśnia 2023 hoda. Fota: Korean Central News Agency/Korea News Service via AP, File
U Kramli spadziajucca, što vizit Uładzimira Pucina ŭ KNDR adbudziecca ŭ ahladnaj budučyni, pra heta zajaviŭ jaho pres-sakratar Dźmitryj Piaskoŭ. Jon udakładniŭ, što terminy pajezdki buduć uzhadniacca pa dypłamatyčnych kanałach, piša «Sputnik».
«Vy viedajecie, što va Uładzimira Pucina jość zaprašeńnie naviedać Pchieńjan z aficyjnym vizitam, i my spadziajemsia, što taki vizit adbudziecca, prezident Rasii naviedaje ŭ ahladnaj budučyni», — skazaŭ Piaskoŭ žurnalistam.
Raniej z aficyjnym vizitam u Maskvu prybyła kiraŭnik MZS KNDR Coj Son Chi. U MZS Rasii paviedamili, što pieramovy kiraŭnikoŭ źniešniepalityčnych viedamstvaŭ adbuducca 16 studzienia. Radyjo «Hołas Karei» napiaredadni paviedamiła, što kiraŭnik paŭnočnakarejskaha MZS ździajśniaje vizit u Rasiju pa zaprašeńni svajho rasijskaha kalehi Siarhieja Łaŭrova.
Jak rastłumačyŭ Piaskoŭ, nie vyklučana taksama i sustreča rasijskaha prezidenta z kiraŭnikom MZS KNDR.
Pradstaŭnik Kramla paviedamiŭ, što Rasija maje namier i dalej raźvivać partniorskija stasunki z KNDR va ŭsich kirunkach. Jon adznačyŭ, što ŭ pieršuju čarhu Paŭnočnaja Kareja źjaŭlajecca susiedniaj z Rasijaj krainaj, a taksama partnioram.
«Dyjałoh na ŭsich uzroŭniach budzie praciahvacca z KNDR», — skazaŭ Piaskoŭ.
Rasija i KNDR sioleta adznačajuć 75-hodździe padpisańnia pieršaha pahadnieńnia ab ekanamičnym i kulturnym supracoŭnictvie. Dakumient zakłaŭ asnovu raźvićcia handlova-ekanamičnaha ŭzajemadziejańnia dźviuch krain.