Па справе «INeedHelpBY» затрымалі 143 чалавекі. Кіраўнік ініцыятывы кажа, што з іх боку ўцечак інфармацыі не было
Кіраўнік праекта INeedHelpBY Філіп Гаўрышаў пракаментаваў масавыя затрыманні экс-палітвязняў і іх сваякоў. Ён сказаў, што узломаў сістэмы і ўцечак інфармацыі з боку праекта не было, а таксама даў парады, што рабіць у такой сітуацыі.
25.01.2024 / 09:11
«Мы пацвярджаем, што падчас допыту ў часткі затрыманых пытаюцца, ці атрымлівалі яны прадуктовую дапамогу ад INeedHelpBY. У большасці выпадкаў людзей адпускаюць дадому ў адсутнасць падстаў для прыцягнення да адказнасці і доказаў ўзаемадзеяння з ініцыятывай.
Хочам яшчэ раз растлумачыць, як працуе наш праект. Галоўная задумка ў тым, што ніхто не атрымлівае дапамогу асабіста ад ініцыятывы. Беларусы, якія апынуліся ў цяжкай фінансавай сітуацыі, атрымліваюць дапамогу ад неабыякавых суайчыннікаў, якія жадаюць дапамагчы прадуктамі харчавання. Гэта значыць фізічныя асобы аказваюць дапамогу іншым фізічным асобам добраахвотна з дабрачыннымі намерамі. Таму ўся атрыманая дапамога накіравана і атрымана не ад арганізацыі INeedHelpBY, а ад прыватных асоб — ад сяброў, прыяцеляў, знаёмых і землякоў; імі ж яна і была аплачана», — напісаў Філіп Гаўрышаў.
Ён таксама даеў некалькі парадаў, што рабіць, калі да вас прыйшлі.
- 1. У першую чаргу выдаліць тэлеграм-бот ініцыятывы, бо яго ўключылі ў спіс экстрэмісцкіх матэрыялаў.
- 2. Настойваць на тым, што дапамогу атрымлівалі ад беларусаў, а не ад ініцыятывы.
- 3. Калі жадаеце выдаліць асабістыя даныя з сістэмы — напісаць ў службу падтрымкі.
- 4. Адпісацца ад сацсетак INeedHelpBY.
- 5. Пачысціце кэш.
Тым часам кіраўнік «Байсол» Андрэй Стрыжак паведаміў, што вядома пра 143 факты затрымання падчас аблавы з 23 студзеня па сённяшні дзень.
Чытайце таксама:
Што пыталіся ў сваякоў палітвязняў, якіх масава затрымлівалі ўчора? І пры чым тут «Едастаўка»
Андрэй Стрыжак: Сілавікі атрымалі доступ да базаў «Еўраопта»