Rasijski inžynier skončyŭ žyćcio samahubstvam paśla taho, jak rakieta zabiła jahonuju babulu ŭ Charkavie? Nie, fejk
Pa ŭkrainskich i biełaruskich krynicach razyšłasia navina pra inžyniera rasijskaha abaronnaha pradpryjemstva Antona Harabca, jaki nibyta pajšoŭ z žyćcia, pakinuŭšy kranalnuju pieradśmiarotnuju zapisku.
29.01.2024 / 16:27
Zabluranaje fota čałavieka, jaki, byccam by, skončyŭ žyćcio samahubstvam. Imavierna, jano niesapraŭdnaje. Fota: telehram-kanał «Novaja vialikaja Rasija»
Pa lehiendzie telehram-kanałaŭ, pryčynaj stała jaho datyčnaść da vytvorčaści rakiet, jakimi dniami atakavali Charkaŭ. U mužčyny, jakoha kličuć «Anton Iharavič Harabiec», maŭlaŭ, pad abstrełami zahinuła babula. A jon byŭ inžynieram na pradpryjemstvie «Ałmaz-Antej», jakoje robić rakiety vysokaj dalokaści. I voś što tut nie tak.
Pa-pieršaje, my nie adšukali čałavieka z takim imiem, jaki b moh pracavać na pradpryjemstvie. Adziny patencyjny kandydat, taksama Anton Harabiec, choć i pracavaŭ inžynieram-kanstruktaram na pradpryjemstvie «Ałmaz-Antej», ale ŭsiaho adzin hod u siaredzinie 2010-ch, a ciapier žyvy-zdarovy i zajmajecca SMM.
A adziny «Iharavič» z usich Antonaŭ Harabcoŭ žyvie ŭ inšaj miascovaści i jamu ŭsiaho 23 hady. Anijakaha dačynieńnia da abaronnaj pramysłovaści jon nie maje.
«Pieradśmiarotnaja zapiska». Fota: telehram-kanał «Novaja vialikaja Rasija»
Pa-druhoje, u zapiscy jość faktyčnaja pamyłka. Aŭtary nazyvajuć pradpryjemstva «HałOŭnaje sistemnaje kanstruktarskaje biuro». Ale aficyjna jano nazyvajecca «hałAŭnym» — heta kłasičnaja postsavieckaja nazva dla kanstruktarskich biuro, jakija časta kirujuć sietkaj inšych. Takija jość i ŭ Biełarusi, naprykład, «Hałaŭnoje śpiecyjalizavanaje kanstruktarskaje biuro» ŭ Breście.
Małaimavierna, kab čałaviek, jaki tam pracavaŭ, nie viedaŭ navat nazvy pradpryjemstva.
Pa-treciaje, zhodna ź pieršapačatkovym dopisam, mužčyna pracavaŭ na pradpryjemstvie «Kupał», jakoje padparadkoŭvajecca «Ałmaz-Antej». Ale jano nie zajmajecca vytvorčaściu rakietaŭ.
Adzinaje, što jano vyrablaje — heta zienitna-rakietnyja kompleksy «Tor», a taksama vučebna-trenirovačnyja rakiety, jakija vykarystoŭvajucca dla pravierki sistemaŭ SRA. «Tory» majuć maksimalnuju dalokaść da 15 kiłamietraŭ i nie majuć datyčieńnia da abstrełaŭ ukrainskich haradoŭ.
Pieršakrynicaj dopisu byŭ kanał «Novaja vialikaja Rasija». Heta kanał, jaki publikuje roznyja «pratesnyja» rasijskija naviny bieź pieršakrynicaŭ. Inšych paćvierdžańniaŭ historyi nie isnuje, chacia jany musili b być u vypadku takoha nadzvyčajnaha vypadku.
Čytajcie taksama:
Na ANT pakazali fejkavuju apytanku — i nie zaŭvažyli, što jaje žartam stvaryli inšyja prapahandysty
Prapahandyst Piatroŭski pavioŭsia na afišu fejkavaha filma. I navat «praanalizavaŭ» jaho