Što źmianiłasia ŭ biełaruskaj armii paśla 2020 hoda
Alaksandr Sachaščyk u novym vypusku «Tok» raspavioŭ pra toje, što vahnieraŭcy pryvieźli z saboju ŭ Biełaruś, jak u vojsku staviacca da ŭkraincaŭ i ci hatovaja biełaruskaja armii da vajny.
31.01.2024 / 15:47
Jak źmianiłasia biełaruskaja armija paśla 2020 hoda
Alaksandr Sachaščyk słužyŭ u Siłach śpiecyjalnych apieracyj.
«Da 2020 hoda ŭ vojsku było vielmi šmat pakazuchi, uklučna sa štohadovymi paradami. Paśla 2020-ha, kali sutyknulisia z novymi pahrozami, pačali da ich rychtavacca ŭžo previentyŭna. Stali nadavać bolš uvahi bajavoj padrychtoŭcy.
A z pačatkam vajny pakazuchi stała jašče mieniej. Ludzi ŭ vojskach pabačyli tyja niedachopy i niedapracoŭki, da čaho jany rychtavalisia i jak heta adbyvajecca ciapier va Ukrainie. Praktyčna ź pieršych dzion vajny pačaŭ pierajmacca bajavy dośvied jak rasijskich, tak i ŭkrainskich vojskaŭ».
Sachaščyk źviartaje ŭvahu, što vajna va Ukrainie vielmi mocna adroźnivajecca ad taho, da čaho rychtavalisia raniej. U pieršuju čarhu na taktyčnym uzroŭni.
Što pryvieźli vahnieraŭcy ŭ Biełaruś
Vajskoviec adznačaje, što bajavyja praktyki, jakija vahnieraŭcy pryvieźli ŭ Biełaruś, u pieršuju čarhu źviazanyja ź indyvidualnaj bajavoj padrychtoŭkaj bajcoŭ i pracaj małych taktyčnych hrup. Pry hetym, pa słovach mužčyny, «ničoha bujnoha, cikavaha jany nie pryvieźli».
Vahnieraŭcy pravodziać zaniatki pa miedycynie, vučać pracavać z dronami i zbrojaj, karektavać ahoń artyleryi. Heta ŭsio jon nazyvaje «bytavym» i zaŭvažaje, što ŭ biełaruskim vojsku dobry tearetyčny zadzieł pa hetych aśpiektach, a vahnieraŭcy pryvieźli praktyku.
Jak staviacca da ŭkraincaŭ u biełaruskim vojsku
Pa słovach mužčyny, va Uzbrojenych siłach Biełarusi nianaviść da ŭkraincaŭ nie naviazvajecca. «Heta padajecca trochi ź inšaha punktu hledžańnia: NATA pašyraje svaje miežy, sprabuje na terytoryi Ukrainy vyrašyć usie prablemy, jakija jość z Rasijskaj Fiederacyjaj. A Ukraina prosta stała achviaraj. Ale heta naš braterski narod.
Toje, što tyčycca nacyzmu va Ukrainie, to ja asabista takoha nie čuŭ. Maje kamandziry i načalnik ni adnaho razu mnie takuju infarmacyju nie davodzili. Tak, mahła być niejkaja dyskusija pohladaŭ, ale heta nie aficyjny punkt hledžańnia».
Kali havaryć pra ahulnaje staŭleńnie da ŭkraincaŭ u biełaruskim vojsku, to jaho składana sčytać.
«Tamu što ludzi viedajuć viektar, jaki zadaje Łukašenka. Da tych, chto havoryć nie ŭ jaho razrezie, prajaŭlajuć pilnuju ŭvahu.
U biełaruskim vojsku słužać ludzi ź ćviarozym rozumam. I kali adbyvajucca padziei, jakija my nazirajem u apošnija hady, heta jašče nie značyć, što ŭsie vajennasłužačyja padtrymlivajuć heta. Da ŭkraincaŭ ludzi adnosiacca ciopła».
Sachaščyk adznačaje, što, biezumoŭna, taja prapahanda, jakaja pajšła paśla 2014 hoda, adbiłasia na pohladach niekatorych radykalnych biełaruskich vajennych. Ale takich vielmi niaznačnaja častka.
Ci hatova biełaruskaja armija da vajny
Adkazvajučy na pytańnie, nakolki postsavieckaja madel arhanizacyi armii adpaviadaje patrebam sučasnaj vajny, Sachaščyk vykazaŭ dumku, što biełaruskaj armii nieabchodna hłabalnaja reforma. Varta pierahledzieć Kancepcyju nacyjanalnaj biaśpieki, vajennuju daktrynu, štaty voinskich čaściej. Ale heta ŭsio — vialikaja i surjoznaja rabota.
«Biełaruskija Uzbrojenyja siły dobra padrychtavanyja, ale čas niaŭmolna biažyć napierad. I heta datyčyć nie tolki biełaruskich Uzbrojenych sił, ale ŭsich Uzbrojenych sił na Ziamli. Nieabchodna paśpiavać za hetym časam. Mahčyma, u hetym pytańni Biełarusi treba bolš za inšych staracca».
Hladzicie całkam: