Pašynian: Armiju niemahčyma raźvivać u supracoŭnictvie z RF
Rasija bolš nie moža być asnoŭnym vajennym partnioram Armienii, «jak pa abjektyŭnych, tak i pa subjektyŭnych pryčynach», — zajaviŭ premjer-ministr Nikoł Pašynian.
02.02.2024 / 13:11
Nikoł Pašynian. Fota: Mikhail Metzel, Sputnik, Kremlin Pool Photo via AP
Jerevan šukaje novych partnioraŭ dla vajskova-techničnaha supracoŭnictva, bo nie moža jaho realizoŭvać tolki z Rasijaj, jak heta było dahetul, zajaviŭ premjer-ministr Nikoł Pašynian u intervju hramadskamu Radyjo Armienii ŭ čaćvier, piša Deutsche Welle.
Sa słoŭ Pašyniana, raniej 95-97 pracentaŭ adnosin Armienii ŭ abaronnaj śfiery byli z RF, ciapier «hetaha nie moža być jak z abjektyŭnych, tak i z subjektyŭnych pryčyn». Armienii «treba zrazumieć, z kim my realna možam mieć stasunki vajskova-techničnaha i abaronnaha charaktaru».
Jak zaŭvažyŭ kiraŭnik urada, u studzieni 2022 hoda ŭłady Armienii padrychtavali kancepcyju refarmavańnia armii ŭ supracoŭnictvie z Rasijaj. Adnak padziei zimy taho hoda — błakavańnie Azierbajdžanam Łačynskaha kalidora, jaki złučaje Nahorny Karabach z Armienijaj — pakazali, što «my nie možam prasoŭvacca z hetaj kancepcyjaj, i zaraz my pavinny zrazumieć, nakolki realistyčna supracoŭnictva ŭ vajenna-techničnaj śfiery» z Maskvoj, skazaŭ Pašynian.
Pa słovach premjera, treba źmianić kancepcyju raźvićcia armii. Jon paabiacaŭ, što taki dakumient budzie pryniaty da kanca hoda.
Kryzis u adnosinach pamiž Armienijaj i ADKB
Paśla zakančeńnia bajavych dziejańniaŭ u Nahornym Karabachu ŭ vieraśni 2023 hoda Pašynian nazvaŭ struktury, u jakich udzielničaje Armienija, nieefiektyŭnymi, majučy na ŭvazie arhanizacyju Damovy ab kalektyŭnaj biaśpiecy (ADKB). Členstva Armienii ŭ ADKB, prynamsi, pačynajučy z 2020 hoda, ničoha nie prynosić Jerevanu, zajaviŭ letam sakratar Rady biaśpieki krainy Armien Hryharan. «Z 2020 hoda z boku Azierbajdžana na Armieniju adbyłosia try šyrokamaštabnyja napady, pry jakich ADKB nie akazała Armienii jakoha-niebudź sadziejničańnia», — skazaŭ jon.
U studzieni 2023 hoda Armienija admoviłasia pravodzić vučeńni ADKB na svajoj terytoryi, a ŭ lipieni vyrašyła nie ŭdzielničać u vučeńniach vyratavalnych słužbaŭ hetaj arhanizacyi ŭ Biełarusi. U mai 2023 hoda Nikoł Pašynian dapuściŭ vychad Armienii sa składu ADKB. U listapadzie premjer nie pryjechaŭ na minski samit ADKB i paprasiŭ arhanizacyju źniać dakumient ab dapamozie Jerevanu z paradku sustrečy.
U vieraśni 2023 hoda Armienija praviała na svajoj terytoryi sumiesnyja z ZŠA vajskovyja vučeńni, zadačaj jakich była padrychtoŭka da ŭdziełu ŭ mižnarodnych miratvorčych misijach.
Čytajcie taksama:
Pašynian abvinavaciŭ Rasiju ŭ niepastaŭcy zbroi
Armienija moža zakryć rasijskuju vajskovuju bazu — Pašynian
Pašynian: Armienija hatovaja być bližejšaj da ES, nakolki Jeŭrasajuz ličyć heta mahčymym
Armienija admoviłasia ad udziełu ŭ jašče adnym mierapryjemstvie ADKB
«Tam ža niama nivodnaha jaŭreja!» Łukašenka błytana patłumačyŭ, čamu JeŭrAzES nie zhubić Armienii