Sprava ab zabaronie Trampu bałatavacca — Viarchoŭny sud schilajecca na bok eks-prezidenta
Trampu słuchańni spadabalisia.
09.02.2024 / 07:53
Donald Tramp. Fota: Rebecca Blackwell / AP
Viarchoŭny sud ZŠA ŭ čaćvier pravioŭ słuchańni pa pazovie Donalda Trampa suprać štata Kałarada, jaki zabaraniŭ uklučać imia Trampa ŭ biuleteni na prezidenckich vybarach. Kali budzie abvieščana rašeńnie, pakul nieviadoma, ale žurnalisty i jurysty, jakija sačyli za słuchańniami, užo ciapier amal całkam upeŭnienyja, što jano budzie na karyść eks-prezidenta, piša Bi-bi-si.
U śniežni Viarchoŭny sud štata Kałarada zabaraniŭ uklučać imia Donalda Trampa ŭ śpis kandydataŭ na pasadu prezidenta ZŠA, spasłaŭšysia na artykuł Kanstytucyi ZŠA, jaki zabaraniaje zajmać dziaržaŭnyja pasady ŭdzielnikam buntu.
Sudździ ŭ Kałarada, jak i mnohija krytyki Trampa, ličać, što jon paśla papiarednich vybaraŭ sprabavaŭ niezakonnymi mietadami admianić ich vyniki i padbuchtorvaŭ svaich prychilnikaŭ da šturmu Kapitolija ŭ studzieni 2021 hoda.
«Bolšaść sudździaŭ Viarchoŭnaha suda, zdajecca, turbuje dumka, što adzin asobny štat moža raspačać takija radykalnyja dziejańni suprać lidara respublikanskaha kandydata na prezidenckich vybarach [ … ] paśla dźviuch hadzin dyskusii sprava vyhladaje tak, što ŭpeŭnienaja kansiervatyŭnaja bolšaść sudździaŭ maje namier zaniać bok Trampa i pakinuć jaho ŭ biuleteniach», — paviedamlaje karespandent Bi-bi-si.
«Bolšaść sudździaŭ Viarchoŭnaha suda, miarkujučy z usiaho, schilajecca da taho, kab skasavać pastanovu suda štata ab zabaronie Donaldu Trampu znoŭ bałatavacca ŭ prezidenty», — paŭtaraje jamu karespandent ahienctva AFP.
Žurnalisty adznačajuć, što vostryja pytańni pradstaŭniku štata Kałarada zadavali i kansiervatyŭna, i libieralna nastrojenyja čalcy Viarchoŭnaha suda.
«Kałaradskamu rašeńniu kaniec», — rašuča zajaviŭ Bi-bi-si prafiesar kanstytucyjnaha prava Bostanskaha ŭniviersiteta Robiert Caj.
«Pasłuchaŭšy vusnyja sprečki, ciažka sabie ŭjavić, što hety sud pastupić niejak inakš, čym admienić rašeńnie Viarchoŭnaha suda», — upeŭnieny prafiesar Caj.
A kali ŭsio pačnuć?
Staršynia Viarchoŭnaha suda Džon Robierts, sudździa z reputacyjaj kansiervatara, vykazaŭ zdahadku, što rašeńnie na karyść štata Kałarada moža pryvieści da ciažkich nastupstvaŭ dla ŭsiaho pracesu vybaraŭ prezidenta.
«Kali pazicyja Kałarada budzie padtrymana, to, viadoma ž, pačnucca pracedury dyskvalifikacyi [kandydataŭ] i ź inšaha boku. Ja miarkuju, što niemałaja kolkaść štataŭ skaža: chto b ni byŭ kandydat ad Demakratyčnaj partyi, preč ź biuleteniaŭ!»— skazaŭ sudździa Robierts.
To-bok vynik prezidenckich vybaraŭ buduć vyznačać usiaho niekalki štataŭ.
Nasiadała na pradstaŭnika Kałarada i člen Viarchoŭnaha suda Elena Kahan, sudździa z reputacyjaj libierała.
«Ja dumaju, što pytańnie, na jakoje vy pavinny znajści adkaz — heta čamu asobny štat moža vyrašać, chto stanie prezidentam Złučanych Štataŭ. Čamu asobny štat moža vyrašać nie tolki za svaich hramadzian, ale i za ŭsiu astatniuju nacyju?»,— pytałasia jana.
Trampu spadabalisia słuchańni
Donald Tramp paśla słuchańniaŭ sabraŭ reparcioraŭ u svaim majontku ŭ Fłarydzie i skazaŭ im, što spadziajecca na rašeńnie na jaho karyść. Chod słuchańniaŭ Tramp acaniŭ jak «vielmi vydatny praces».
«Ci mahčyma čałavieku, jaki ŭsiudy [u apytańniach] lidziruje, uziać i skazać: tak, my tabie nie damo bałatavacca? Viedajecie, ja dumaju, heta było b žorstka. Ale ja pakidaju heta na mierkavańnie Viarchoŭnaha suda», — skazaŭ eks-prezident.
Tramp znoŭ nazvaŭ rašeńnie kałaradskaha suda i inšyja padobnyja dziejańni suprać jaho sprobami Demakratyčnaj partyi ŭmiašacca ŭ pieradvybarčy praces.
Kali rašeńnie?
Viarchoŭny sud raniej vyrašyŭ razhledzieć pazoŭ Trampa suprać Kałarada ŭ paskoranym paradku.
Kali mienavita budzie abvieščana rašeńnie, nieviadoma, ale sudździ, mahčyma, buduć aryjentavacca prynamsi na adnu kankretnuju datu: prajmieryz Respublikanskaj partyi ŭ Kałarada projduć 5 sakavika.
Imia Trampa ŭ biuleteniach usio roŭna budzie, choć by tamu, što jany ŭžo drukujucca i buduć razasłanyja dla hałasavańnia pa pošcie ŭ nastupnyja dni. Ale arhanizataram hałasavańnia treba budzie viedać, ci ličyć hałasy za Trampa.
Čytajcie taksama:
Kankurentka Trampa na prajmieryz paprasiła Sakretnuju słužbu pra abaronu z-za pahrozaŭ
Śpiavačka Tejłar Śvift stavić pad pahrozu pieramohu Trampa
Tramp nanios vyrašalny ŭdar u Ńju-Hempšyry. Ale Niki Chejli abiacaje nie zdavacca
U Trampa zastałasia tolki adna supiernica pierad vybarami-2024. Chto takaja Niki Chejli?
Hałoŭny supiernik Trampa siarod respublikancaŭ źniaŭsia z vybaraŭ na jaho karyść