«Pažyły čałaviek z drennaj pamiaćciu». Bajdenu vyrašyli nie vystaŭlać abvinavačvańniaŭ pa spravie ab sakretnych dakumientach
Prezident ZŠA abrynuŭsia z hnieŭnaj krytykaj na rasśledavańnie, jakoje pakazała, što jon parušaŭ praviły abychodžańnia z całkam sakretnymi fajłami i z-za pravałaŭ u pamiaci nie moh uspomnić klučavyja padziei svajho žyćcia.
09.02.2024 / 11:35
Džo Bajden padčas učorašniaha bryfinhu. Fota: Evan Vucci / AP
Na niezapłanavanym bryfinhu ŭ Biełym domie ŭ čaćvier viečaram Bajden zajaviŭ žurnalistam: «U mianie z pamiaćciu ŭsio ŭ paradku», piša Bi-bi-si.
Prezident ZŠA adchiliŭ śćviardžeńnie, što jon nie moh uspomnić, kali pamior jaho syn.
«Jak, čort vaźmi, jon śmieje padymać heta?» — skazaŭ Bajden, majučy na ŭvazie śpiecprakurora Robierta Chura, jaki nazvaŭ Bajdena «pažyłym čałaviekam z dobrymi namierami i drennaj pamiaćciu».
Ministerstva justycyi ZŠA zajaviła, što nie budzie vystaŭlać abvinavačvańni prezidentu ZŠA Džo Bajdenu, jaki ŭ parušeńnie praviłaŭ zachoŭvaŭ u siabie doma sakretnyja dakumienty.
«My pryjšli da vysnovy, što nasamreč niama padstaŭ dla vystaŭleńnia kryminalnych abvinavačvańniaŭ», — havorycca ŭ zajavie Robierta Chura.
Apytańni hramadskaj dumki pakazvajuć, što ŭzrost Bajdena vyklikaje niepakoj u amierykanskich vybarščykaŭ napiaredadni listapadaŭskich prezidenckich vybaraŭ (u listapadzie 2024 hoda jamu budzie 82 hady — NN).
«Ja dziejničaju z najlepšych mierkavańniaŭ, — skazaŭ Džo Bajden. — Ja stary. Ja viedaju, jakoha čorta ja rablu. Ja pastaviŭ hetuju krainu na nohi».
«Mnie nie patrebnyja jahonyja rekamiendacyi», — adrezaŭ Bajden, kažučy pra śpiecprakurora. Adkazvajučy na pytańnie, ci pryznaje jon adkaznaść za zachoŭvańnie sakretnych dakumientaŭ u svaim domie, jon abvinavaciŭ u hetym svaich supracoŭnikaŭ.
Pavodle jaho słoŭ, Bajden nie viedaŭ, što jany pakłali kanfidencyjnyja papiery ŭ jaho haraž, dzie, pa słovach śpiecyjalnaha prakurora, jany zachoŭvalisia pobač z sabačaj lažankaj.
Reparcior Bi-bi-si ŭ zale dypłamatyčnych pryjomaŭ Biełaha doma nazvaŭ atmaśfieru bryfinhu napružanaj.
Kali chtości skazaŭ, što amierykanski narod zaniepakojeny jaho ŭzrostam, Bajden pavysiŭ hołas u adkaz: «Heta Vaša mierkavańnie, heta Vaša mierkavańnie».
Dakumienty byli znojdzienyja padčas pieratrusu ŭ domie Bajdena ŭ štacie Dełaver u studzieni minułaha hoda. Častka ź ich adnosicca da taho pieryjadu, kali Bajden byŭ sienataram, inšyja — da času jaho znachodžańnia na pasadzie vice-prezidenta.
Paśla vyjaŭleńnia sakretnyja dakumienty, jak paviedamlałasia, byli pieradadzienyja ŭ Nacyjanalny archiŭ i Miniust.
U chodzie rasśledavańnia było praviedziena 173 hutarki sa 147 śviedkami, uklučajučy samoha Bajdena. Jaho farmalny dopyt adbyŭsia ŭ kastryčniku.
U dakładzie asobna adznačajecca, što padčas hutarak ofis śpiecprakurora zafiksavaŭ «značnyja abmiežavańni» ŭ pamiaci Džo Bajdena.
U pryvatnaści, kali pravodziŭsia dopyt, prezident nie pamiataŭ, kali jon byŭ vice-prezidentam, a ŭ druhi dzień dopytu — kali pačaŭsia termin jaho paŭnamoctvaŭ na hetaj pasadzie. Jak adznačajecca ŭ dakładzie, Bajden nie pamiataŭ, kali pamior jaho syn Bo.
U 345-staronkavym dakładzie Miniusta havorycca, što dziejańni Džo Bajdena «ŭjaŭlajuć surjoznuju ryzyku dla nacyjanalnaj biaśpieki», ale «likvidacyja hetych ryzyk šlacham pradjaŭleńnia kryminalnych abvinavačvańniaŭ nie źjaŭlajecca razumnaj mieraj».
Džo Bajden vitaŭ hetaje rašeńnie i zajaviŭ, što «pytańnie zakrytaje». Pradstaŭniki Donalda Trampa (jaho aficyjna abvinavačvali ŭ nienaležnym abychodžańni z sakretnymi dakumientami) padvierhnuli rašeńnie śpiecprakurora rezkaj krytycy.
«Jak my možam daviarać jaho zdolnaści kiravać našaj krainaj, kali jaho pamiać maje «značnyja abmiežavańni»??!!»— napisała pres-sakratarka Trampa Kerałajn Livit u sacsietcy X.
Čytajcie taksama:
Śpiavačka Tejłar Śvift stavić pad pahrozu pieramohu Trampa
Da pieradvybarčaj kampanii Bajdena padklučycca eks-dziaržsakratar ZŠA
Sprava ab zabaronie Trampu bałatavacca — Viarchoŭny sud schilajecca na bok eks-prezidenta