«Kab razarvać krainu i źniščyć usio». SK zavioŭ kryminałku na ŭdzielnikaŭ «Kadravaha reziervu dla novaj Biełarusi»
SK vypuściŭ admysłovuju zajavu, u jakoj pryhraziŭ kryminałkaj udzielnikam inicyjatyvy, abvieščanaj Abjadnanym pierachodnym kabinietam u sakaviku minułaha hoda, — «Kadravaha reziervu dla novaj Biełarusi».
14.02.2024 / 15:56
Pres-słužba SK u svaim relizie nie škadavała emocyj i mastackich vobrazaŭ. Pavodle SK, «hetaja inicyjatyva ŭ ekstremisckich supolnaściach zjaŭlajecca nie čym inšym, jak «kuźniaj kadraŭ» dla pryznačeńnia na klučavyja pasady ŭ psieŭdadziaržavie, jakuju staranna maluje Cichanoŭskaj i Ko ŭ spravazdačach pierad sponsarami, idei jakoha jany prahnuć nasadzić na terytoryi Respubliki Biełaruś paśla siłavoha zachopu ŭłady ŭ krainie».
Pavodle SK, płan inicyjatyvy — «stvaryć z ekstremistaŭ, jakija nienavidziać isnujučy ŭ krainie paradak, «bałvanki» dla pryznačeńnia na kirujučyja dziaržaŭnyja pasady, uzbrojena ŭvarvacca na terytoryju krainy, pravieści masavyja lustracyi ŭ dačynieńni da addanych radzimie pradstaŭnikoŭ ułady, pravaachoŭnikaŭ, hramadskich dziejačaŭ, pryvieści paplečnikaŭ-radykałaŭ, kab razarvać krainu i źniščyć usio, što było stvorana za apošnija 30 hadoŭ».
Śledčy kamitet Respubliki Biełaruś kvalifikuje dziejnaść inicyjatyvy, u tych liku jaje ŭdzielnikaŭ, jakija,pavodle SK, znachodziacca ŭ Biełarusi, pa č.3 art. 361-1 KK (uvachodžańnie asoby ŭ skład ekstremisckaha farmiravańnia ŭ metach ździajśnieńnia złačynstvaŭ ekstremisckaj nakiravanaści).
Da ŭstanoŭlenych udzielnikaŭ, jakija znachodziacca za miežami Respubliki Biełaruś, budzie prymieniena pracedura śpiecyjalnaj vytvorčaści.
Pra zapusk kampanii «Kadravy rezierv dla novaj Biełarusi» było abvieščana ŭ sakaviku 2023 hoda.
«Dla taho, kab dziaržaŭnaja sistema paśpiachova funkcyjanavała paśla pieramien, pad ehidaj APK projduć stažyroŭki ŭ krainach ES, u jakich prymuć udzieł budučyja dziaržaŭnyja słužačyja. Jany zojmuć dziaržaŭnyja pasady i buduć ažyćciaŭlać reformy», — havaryłasia ŭ abviestcy. Da navučańnia moh dałučycca luby biełarus, jaki mieŭ žadańnie, vopyt i adukacyju dla efiektyŭnaha vykanańnia słužbovych abaviazkaŭ u śfiery dziaržaŭnaha administravańnia paśla źmien u Biełarusi.