Што за берасцеец, якога КДБ выстаўляе ўкраінскім дыверсантам? У сацсетках ён адэпт «рускага свету» і прыхільнік Расіі ў вайне
У сацсетках Віталь Уласюк дзякуе беларускаму АМАПу за тое, што ён «не ўстаў на калені і не прадаў краіну Захаду».
16.02.2024 / 18:06
Затрыманаму Віталю Уласюку 53 гады. Ён нарадзіўся ў Туркменістане, у горадзе Кізіл-Арват (цяпер — Гызыларбат). Імаверна, у сям'і вайскоўца, бо тады ў горадзе базіраваўся штаб 58-й матастралковай дывізіі.
Вядома, што некалі ён служыў у вайсковай частцы №92161 — гэта 38-я асобная гвардзейская дэсантна-штурмавая брыгада, якую некалі ўзначальваў Валерый Сахашчык.
Па звестках «Белпола», якія цытуе «Медыязона.Беларусь», Уласюк працаваў мантажнікам. Чым ён займаўся ў апошні час, дакладна невядома. У тэлеграме мужчына цікавіўся пошукам працы, у тым ліку ў Польшчы і іншых краінах замежжа.
А ў сацсетках мужчына публікуе ды лайкае ў асноўным матэрыялы, якія праслаўляюць «рускі свет» і вайну, а таксама пляжаць рух за свабодныя выбары ў Беларусі.
Публікацыі Віталія ў Аднакласніках
Таксама ён удзельнічаў у рускамірскіх мерапрыемствах — да прыкладу, у «несмяротным палку».
Віталь на «несмяротным палку» з георгіеўскай стужкай — злева ў блакітнай кашулі
КДБ заявіў, што правёў «контртэрарыстычную аперацыю», каб затрымаць «агентаў СБУ», якія быццам планавалі тэракты ў Расіі і Беларусі. Незразумела, як погляды мужчыны стыкуюцца з такім азначэннем.
Чытайце таксама:
«Справа АГСБ»: як КДБ арганізоўваў «тэракты»
У КДБ расказалі, што нібыта затрымалі ў Лельчыцкім раёне дыверсантаў СБУ