Izrail abviaściŭ datu šturmu Rafacha, kali CHAMAS nie vyzvalić zakładnikaŭ
Tam znajšli prytułak kala 1,5 młn paleścincaŭ. Heta budzie pačatak Ramadana.
19.02.2024 / 07:43
Paleścincy sprabujuć kupić chleb u piakarni ŭ Rafachie. Fota: Fatima Shbair / AP
Ministr izrailskaha vajennaha kabinieta Bieni Hanc papiaredziŭ, što kali CHAMAS nie vyzvalić usich zakładnikaŭ, jakija ŭtrymlivajucca ŭ Hazie, Izrail 10 sakavika pačnie šturm Rafacha na poŭdni siektara, piša Bi-bi-si.
Raniej ahienctva AAN pa achovie zdaroŭja paviedamiła, što adna z klučavych balnic Hazy pierastała funkcyjanavać paśla izrailskaha rejdu.
Suśvietnaja arhanizacyja achovy zdaroŭja (SAAZ) zajaviła, što joj nie dazvolili ŭvajści ŭ balnicu «Nasier» u Chan-Junis, raźmieščanym na poŭnač ad Rafacha, kab acanić situacyju.
Armija abarony Izraila (CACHAŁ) uvajšła ŭ balničny kompleks u čaćvier, zajaviŭšy, što, pavodle źviestak raźviedki, tam utrymlivajucca zakładniki, zachoplenyja CHAMAS.
CACHAŁ nazvaŭ svaju apieracyju ŭ Chan-Junis «dakładnaj i abmiežavanaj», abvinavaciŭšy CHAMAS u «cyničnym vykarystańni balnic dla teroru».
Vystupajučy ŭ niadzielu, były ministr abarony Izraila Bieni Hanc skazaŭ: «Śviet pavinien viedać, i lidary CHAMAS pavinny viedać — kali da Ramadana našy zakładniki nie viernucca dadomu, bajavyja dziejańni buduć praciahvacca paŭsiul, u tym liku i ŭ rajonie Rafacha».
Ramadan — śviaty dla isłamu miesiac postu — u hetym hodzie pačynajecca 10 sakavika.
Hanc dadaŭ, što Izrail budzie dziejničać «skaardynavana, sadziejničajučy evakuacyi cyvilnych asob u dyjałohu z našymi amierykanskimi i jehipieckimi partniorami, kab źvieści da minimumu achviary siarod mirnaha nasielnictva».
7 kastryčnika minułaha hoda bajeviki, uznačalenyja CHAMAS, atakavali Izrail, zabiŭšy nie mienš za 1200 čałaviek i zachapiŭšy 253 zakładniki. Kala 130 zakładnikaŭ usio jašče ŭtrymlivajucca bajevikami ŭ Hazie.
Pa słovach dypłamatyčnaha karespandenta Bi-bi-si Poła Adamsa, Izrail, imavierna, čakaje, što niekatoryja paleścincy pakinuć siektar Haza i buduć šukać prytułku na jehipieckim baku miažy, dzie ŭłady, zdajecca, budujuć dla hetych metaŭ vialiki kompleks.
Ale izrailskija ŭłady pakul nie paviedamili nijakich padrabiaznaściaŭ ab płanie evakuacyi, dadaje jon.
Da pačatku Ramadana zastajecca roŭna try tydni, i, pa paviedamleńniach z Rafacha, niekatoryja ludzi pakidajuć horad, nakiroŭvajučysia na zachad da ŭźbiarežža, ale bolšaść usio jašče čakajuć, nie viedajučy, što rabić.
Niahledziačy na mižnarodny cisk, premjer-ministr Izraila Bińjamin Nietańjachu paklaŭsia pačać naziemnuju ataku na Rafach, kab źniščyć tam bajevikoŭ CHAMAS.
Jehipiet i niekatoryja inšyja arabskija krainy nieadnarazova papiaredžvali, što izrailski nastup na Rafach moža pryvieści da taho, što mnohija paleścincy buduć vymušanyja biehčy ŭ Jehipiet. Kair ličyć heta nieprymalnym.
Saudaŭskaja Aravija paabiacała «vielmi surjoznyja nastupstvy» ŭ vypadku šturmu Rafacha.
Na mižnarodnym uzroŭni prahučała mnostva zaklikaŭ da Izraila ŭstrymacca ad šturmu Rafacha.
Pa śćviardžeńni padkantrolnaha CHAMAS Ministerstva achovy zdaroŭja ŭ Hazie, z pačatku vajny zahinuli bolš za 28 400 paleścincaŭ i bolš za 68 000 atrymali ranieńni.
Pa danych hetaha viedamstva, prynamsi 127 paleścincaŭ byli zabityja i 205 atrymali ranieńni za apošnija 24 hadziny.
Niahledziačy na bai ŭ Hazie, u apošnija dni ŭ Kairy robiacca namahańni pa zaklučeńni pahadnieńnia ab spynieńni ahniu pamiž Izrailem i CHAMAS, choć katarskija pasiaredniki zajavili, što prahres «nie vielmi šmatspadzieŭny».
Nietańjachu skazaŭ, što pa prośbie prezidenta ZŠA Džo Bajdena adpraviŭ u Kair izrailskich pieramoŭščykaŭ, ale dadaŭ, što jany nie viarnulisia dla dalejšych abmierkavańniaŭ, bo patrabavańni CHAMAS byli «varjackimi».
CHAMAS abvinavačvaje Izrail u adsutnaści prahresu ŭ dasiahnieńni pahadnieńnia ab spynieńni ahniu.
Čytajcie taksama:
CACHAŁ śćviardžaje, što znajšoŭ zakinutuju schovanku lidara CHAMAS u siektary Haza VIDEA
Paleścina nazvała Rasiju aporaj u svajoj baraćbie
Izrail znajšoŭ kamandny punkt CHAMAS u tuneli pad štab-kvateraj AAN