«Akt mižnarodnaha teraryzmu». U Hrodnie projdzie sud za «padrychtoŭku dyviersij»
Biełarusa Vadzima Pacenku i hramadzianina Rasii Alaksieja Kulikova abvinavačvajuć ahułam pa piaci ciažkich artykułach Kryminalnaha kodeksa
21.02.2024 / 13:25
U Hrodzienskim abłasnym sudzie 26 lutaha raspačniecca sud pa «spravie padrychtoŭki dyviersij u Hrodnie». Spravu budzie razhladać Valer Ramanoŭski, piša «Viasna».
Biełarusa Vadzima Pacenku i hramadzianina Rasii Alaksieja Kulikova abvinavačvajuć ahułam pa piaci ciažkich artykułach Kryminalnaha kodeksa:
- • č. 3 art. 289 (akt teraryzmu);
- • č. 3 art. 126 (akt mižnarodnaha teraryzmu);
- • art. 358-1 (ahienturnaja dziejnaść);
- • č. 1 art. 356 (zdrada dziaržavie);
- • č. 1 art. 130 (raspalvańnie inšaj sacyjalnaj varožaści).
22-hadovy Vadzim Pacenka rodam sa Śvisłačy, ale žyŭ u Hrodnie. Viadoma, što mužčyna zajmaŭsia sportam, u tym liku pradstaŭlaŭ rodny horad na junijorskim spartyŭnym mnahaborji. Pacenku zatrymali 3 sakavika 2023 hoda. U praŭładnym filmie «Haspar nie vyšieł na śviaź» zajavili, što jon nibyta pavinien byŭ ździejśnić dyviersiju ŭ Hrodnie. Na kadrach dopytu jon kaža, što jamu «pastavili zadaču padarvać naftabazu z dapamohaj drona i vybuchoŭki». Užo tady zajavili, što jamu inkryminujuć č. 2 art. 289 KK (akt teraryzmu).
Vadzim Pacenka paśla zatrymańnia. Skrynšot ź filma na ANT
Hramadzianinu Rasijskaj Fiederacyi Alaksieja Kulikovu 36 hadoŭ. U tym ža praŭładnym filmie raspaviali, što hod tamu Kulikoŭ źbieh ad pryzyvu, a trapić u Hrodna jamu dapamoh rasiejski apazicyjanier Daniił Krynary (Kavaleŭski). Kulikova zatrymali 26 lutaha 2023 hoda. Pa viersii KDB Alaksiej zdymaŭ na fota abjekty ŭ Hrodnie dla «ŭkrainskich śpiecsłužb» — vajenkamat Hrodna i Hrodzienskaha rajona, vajskovuju častku 41780, naftabazu rajona Auls, naftabazu rajona Dzieviatoŭka, hienkonsulstva RF. Kulikovu vystavili abvinavačvańni pavodle č. 2 art. 289 (akt teraryzmu) i č. 2 art. 126 (akt mižnarodnaha teraryzmu) Kryminalnaha kodeksa.
Viadoma tolki, što mužčyny razam pracavali.
Alaksiej Kulikoŭ paśla zatrymańnia. Skrynšot ź filma na ANT
Jakija i kamu dakładna artykuły staviacca ŭ vinu — pakul nieviadoma.
U praŭładnym filmie «Haspar nie vyšieł na śviaź» raspaviadali, što Vadzima Pacenku i Alaksieja Kulikova abvinavačvajuć mienavita ŭ «padrychtoŭcy aktaŭ teraryzmu» (art. 13 Kryminalnaha kodeksa). Pavodle č. 3 art. 126 Kryminalnaho kodeksa praduhledžana śmiarotnaje pakarańnie.
«Z najaŭnaj infarmacyi niama danych ab realnym ździajśnieńni terarystyčnaha aktu — ździajśnieńni zakončanaha złačynstva. Adnak pradjaŭlenaje abvinavačvańnie vyhladaje pahroźliva, bo z traŭnia 2022 hoda navat zamach na ździajśnieńnie złačynstva, praduhledžanaha č. 3 art. 126 KK, moža karacca śmiarotnym pakarańniem (takoje pakarańnie pa č. 3 art. 126 było praduhledžana pieršapačatkova tolki za zakončanaje złačynstva, jakoje paciahnuła śmierć čałavieka).
Kali ž dziejańni kvalifikavanyja jak padrychtoŭka da złačynstva, to śmiarotnaje pakarańnie abvinavačanym (abo adnamu ź ich) nie pahražaje», — adznačaje Pavieł Sapiełka.
Pry hetym, pravaabaronca zaznačaje, što spadzievaŭ na toje, što pa dadzienaj spravie budzie vyniesieny spraviadlivy prysud, niama:
«Toj fakt, što sprava budzie razhledžanaja z hrubymi parušeńniami pryncypaŭ spraviadlivaha suda — jak minimum, u adsutnaść spabornaści bakoŭ, z parušeńniem prava na abaronu i na razhladu spravy ŭ prysutnaści publiki i pradstaŭnikoŭ ŚMI, a taksama parušeńnie prezumpcyi nievinavataści fihurantaŭ spravy — nie pakidaje nadziei na zakonny i abhruntavany prysud».
Padtrymać viaźniaŭ: Turma-1, Hrodna, vuł. Kirava 1, 230023, Vadzim Andrejevič Pacenka, Alaksiej Vitaljevič Kulikaŭ.
Čytajcie taksama:
Na ANT vypuścili film pra «sietku SBU» ŭ Biełarusi
Vynieśli prysud ajcišniku, zatrymanamu paśla ataki na samalot u Mačuliščach