Арыштаваны беларускі нафтавы магнат і саўладальнік «Гіпа» Васіль Варфаламееў
Выглядае, што менавіта яго заробкам памерам $100 тысяч летась абураўся Аляксандр Лукашэнка.
22.02.2024 / 16:41
Па інфармацыі «Нашай Нівы», на мінулым тыдні ў СІЗА апынулася адна з цэнтральных фігур беларускага бізнэсу. Затрыманы Васіль Варфаламееў, саўладальнік «Гіпа», «Белмаркета», «Эліз» і іншых кампаній. Сэнс выстаўленых яму прэтэнзій пакуль невядомы. Апошнім часам бізнэсмен жыў за мяжой.
Васіль Варфаламееў
У пачатку 2023 года Аляксандр Лукашэнка на ўсю краіну абураўся анамальна высокім заробкам кіраўніцтва сеткі «Гіпа».
Па словах кіраўніка Дзяржкантролю Васіля Герасімава, генеральны дырэктар «Гіпа», які знаходзіцца за мяжой, — у сярэднім зарабляў 258 тысяч рублёў на месяц. Гэта каля $100 тысяч. Выглядае, што гаворка вялася менавіта пра Варфаламеева.
Сетка «Гіпа» — 29 крамаў па ўсёй Беларусі, 23 з якіх сканцэнтраваны ў Мінску і яго ваколіцах.
Чытайце таксама:
ДзяржСМІ апублікавалі памер заробкаў кіраўнікоў прыватных гандлёвых сетак і іх работнікаў
Сяргей Варфаламееў у розныя гады ўваходзіў у топ-20 самых уплывовых беларускіх бізнэсменаў у рэйтынгах, якія складалі эканамічныя журналісты.
Гэта сапраўды багаты чалавек, які зрабіў капітал на гандлі нафтапрадуктамі, а потым пачаў укладвацца ў рытэйл і вытворчасць. Самы знакаміты, але наўрад ці самы прыбытковы бізнес Варфаламеева — сетка крамаў «Гіпа». Там ён генеральны дырэктар і саўладальнік.
«Гіпа» ў гандлёвым цэнтры «Галерэя»
Развязаная Пуціным і Лукашэнкам вайна таксама пахавала амбіцыйны праект па аднаўленні рачного судаходства паміж Беларуссю і Украінай, які збольшага фінансаваўся з грошай Варфаламеева. Планавалася, што Дняпро паглыбяць, у Новых Жарах узнікне порт з пракладзенай да яго чыгункай, адкуль тавары будуць плыць да ўкраінскіх партоў, а адтуль у Чорнае мора.
Вядома, што ў Варфаламеева глыбокі карпаратыўны канфлікт з іншым саўладальнікам «Гіпа» — уласнікам снэкавай кампаніі «Анега» Алегам Бараноўскім. У свой час Бараноўскі купіў у эстонцаў «Анегу», разлічыўшыся па ўгодзе сродкамі «Гіпа» — агульнага з Варфаламеевым бізнэса. Але таго ў долю не ўзяў. Ці на свабодзе сам Бараноўскі і іншыя менеджары «Гіпа», невядома.
Чытайце таксама:
Пагром у сетцы «Суседзі»: КДК затрымаў амаль усё кіраўніцтва
«Кампанію мы выразаем»: затрыманы ўласнік крамаў «Грын» і ГЦ «Скала» Генадзь Кірэйкаў