У Брэсце заўважылі знікненне кіраўніка аднаго з прадпрыемстваў
Нядаўна паведамлялася, што ў Брэсце знік і меркавана затрыманы намеснік старшыні мясцовага аблвыканкама Валянцін Зайчук. Але выглядае, што такая праблема не толькі ў яго аднаго. Паводле звестак тэлеканала «Белсат», больш за месяц ужо не відаць і не чуваць таксама дырэктара прадпрыемства «Брэсцкая кацельная гаспадарка» Юрыя Аверчука.
24.02.2024 / 20:45
Юрый Авярчук (злева) і Сяргей Вайтуховіч. 17 студзеня 2024 года. Фота: bkh.brest.by
Пра тое, што Юрый Авярчук некуды знік, «Белсату» на ўмовах ананімнасці паведамілі супрацоўнікі «Брэсцкай кацельнай гаспадаркі». Яго не бачылі ўжо больш за месяц, а некаторыя сцвярджаюць, што дырэктара прадпрыемства выводзілі з кабінета ў кайданках.
Апошні раз Авярчук з’яўляўся на публіцы 17 студзеня. На фота, размешчаных на сайце прадпрыемства да гэтай даты, можна ўбачыць яго разам з яго намеснікам па ідэалагічнай рабоце Сяргеем Вайтуховічам, далей жа на ўсіх фота Вайтуховіч адзін.
Юрый Авярчук кіраваў «Брэсцкай кацельнай гаспадаркай» з 2017 года, а ў 2022-м, калі прадпрыемства адзначала сваё 55-годдзе, нават прызнаваўся мясцовай уладай чалавекам года.
Неафіцыйныя крыніцы сцвярджаюць, што прычынай магчымага яго затрымання стаў хабар.
Чытайце таксама:
Некуды знік першы намеснік старшыні Брэсцкага аблвыканкама. Магчыма, яго затрымалі