Драма ў Мінску: дзяўчыне падарылі 151 ружу не таго памеру
Маштаб трагедыі мінскай блогеркі зразумее не кожны: дзяўчыне даставілі букет са 151 ружы ад каханага мужчыны. Дык чаму ж яна цяпер у шаленстве?
28.02.2024 / 22:46
Скрыншот відэа ў тыктоку olyadorogaya
Блогерка, якая вядзе тыкток пад нікам olyadorogaya, запісала вельмі эмацыйнае відэа:
— 151! Я ніколі не разумела букетэрыі: чаму вы піхаеце ў букет са 151 ружы такія вось малюпуські?! Вы паглядзіце, які ён маленькі! Я XS памеру. Чалавек, калі заказвае 151 ружу, ён хоча, каб гэта быў вялізны, пышны букет.
Вольга дадала, што больш за ўсё ёй шкада мужчын, якія шчыра жадаюць зрабіць каханай прыемнае: бачаць на сайце букет са 151 ружы (які каштуе прыстойна), заказваюць яго і думаюць: «Яна ніколі такіх велізарных букетаў не атрымлівала, цяпер яна проста будзе ў шоку!» А блогерка атрымлівала — таму для параўнання выклала фота з букетам са 101 ружы правільнага, на яе погляд, памеру ў якасці доказу.
Скрыншот відэа ў тыктоку olyadorogaya
Дзяўчына звязалася і з крамай, якая збірала злашчасны букет.
— Я ім напісала: «А чаму такі маленькі букет?!» І яны такія: «А мы не ведалі, што вам патрэбны быў пышны».
Усяго за дзень ролік набраў больш за 712 тысяч праглядаў і каля 89 тысяч лайкаў.
У каментарыях высветлілася, што за букет мужчына Вольгі заплаціў каля 200 даляраў.
З’явіліся і супрацоўніцы фларыстычных крам — нават з розных краін. Яны спрабавалі растлумачыць, што ў яе букеце кенійскія ружы — гэтыя кветкі сапраўды маюць невялікія бутоны, а даўжыня сцябла каля 40 сантыметраў. І цалкам лагічна, што букет з іх не атрымаецца такім вялікім, як з эквадорскіх руж, у якіх вялікія бутоны і тоўстае сцябло даўжынёю каля 100 сантыметраў. Цэны на гэтыя сарты руж таксама вельмі адрозніваюцца.
Нехта з каментатарак напісаў, што каханы Вольгі проста вырашыў на ёй зэканоміць: пабачыў, што адзін букет са 151 ружы каштуе значна танней за іншы, і замовіў першы. Гэта выклікала хвалю абурэння ў блогеркі:
«Як бязглузда выглядаюць такія каментарыі на фоне таго, які там рэальна мужчына, якому ўсё роўна 100 даляраў ці 500. Не ва ўсіх мужчыны алкашы, якія дораць адну ружу ў цэлафане».
Дзяўчына нават запісала яшчэ адно відэа, каб пераканаць аўдыторыю, што на ёй не маглі зэканоміць.
— Дзяўчаты ў каментарыях сталі пісаць: «Эквадорская была б у два разы даражэйшай, калі хацелі пышны букет». Дзякуй, заюш! Не ведала. Ніколі не атрымлівала 101 ружы нармальнай, уяўляеш?! Некаторыя пісалі, што мужчына спрабаваў на мне зэканоміць. Дзяўчаты, дай бог, каб на вас так эканомілі з букетамі па 200 даляраў!
Дарэчы, у тыкток-акаўнце Вольгі есць відэа з даволі дарагімі падарункамі ад каханага. Пра свайго мужчыну дзяўчына паведаміла: «Ён беларус і не стары!!!»
Цікава, што той самы букет дзяўчына, падобна, атрымала ў падарунак на 14 лютага — і выклала з ім некалькі відэа ў тыктоку. Але вось абурыцца наконт памеру вырашыла чамусьці праз два тыдні.
Чытайце таксама:
Беларус ператварыў адзін з пакояў у цяпліцу і вырошчвае там цюльпаны на продаж
ЖКГ-драма ў сям’і рыбака: шчупакі «памыліся» на 40 кубоў вады
«На першае спатканне прывёз 53 ружы». Як жанчына ў свае 50+ знаёміцца ў інтэрнэце