Stała viadoma, jakija katehoryi ludziej pakinuli za kratami paśla apošniaj abłavy na salidarnych z palitviaźniami
Dakładnaja kolkaść tych, chto apynuŭsia ŭ SIZA, nieviadomaja, ale lik moža iści na dziasiatki.
02.03.2024 / 21:14
Kałaž «Našaj Nivy»
Praź miesiac paśla abłavy na tych, chto dapamahaŭ palitviaźniam, stali viadomyja niekatoryja dadatkovyja padrabiaznaści.
Pieršy aśpiekt — chvala administratyŭnych pratakołaŭ za «atrymańnie zamiežnaj dapamohi». Pa paviedamleńniach «Viasny», achviarami hetaj apieracyi stali bolš za 100 svajakoŭ palitviaźniaŭ. Viadoma taksama, što u adnosinach častki ludziej pieraśled u vyniku spynili, bo vyjšaŭ termin pryciahnieńnia da administratyŭnaj adkaznaści.
Druhi aśpiekt — heta kryminalnyja spravy suprać tych, chto dapamahaŭ palitviaźniam. Imavierna, KDB chacieŭ adspravazdačycca, što adšukaŭ «kurataraŭ» zamiežnaj dapamohi. Adnak, jak vyjaviłasia, pad razdaču patrapili i tyja, chto anijakaj dapamohi ad fondaŭ nie atrymlivaŭ i nie pieradavaŭ.
Akramia svajakoŭ palitviaźniaŭ, abłava zakranuła ludziej, jakija pisali listy, pieravodzili hrošy i dasyłali pasyłki viaźniam ad svajho imia. Jany nie mieli dačynieńnia da fondaŭ dapamohi, ale stali padazravanymi pa artykule 361-4, «sadziejničańnie ekstremisckaj dziejnaści», niekatoryja navat pa druhoj častcy, «u hrupie asobaŭ». Paśla aryštu i vobšukaŭ ich źmiaščali ŭ IČU na 3-10 sutak, častku ludziej paśla adbyćcia hetych terminaŭ adpuścili ŭ statusie padazravanych.
U niekatorych z tych, kaho adpuścili, zabirali pašparty. Ich dahetul nie addali.
Stała viadoma, što častka ludziej, jakija apynulisia ŭ SIZA paśla abłavy KDB, zachoŭvała ŭ svaich telefonach fota i čeki pasyłak, jakija jany dasyłali viaźniam z ułasnych srodkaŭ. Łohika kedebistaŭ i boku abvinavačańnia takaja: kali ty rabiŭ fota, to niekamu spravazdačyŭsia.
Surazmoŭcy «Našaj Nivy» adznačajuć, što ŭsie, chto sistematyčna dasyłaje pasyłki za kraty, rabili fota, kab nie zabycca na toje, što ty dasyłaješ i kamu. Tamu arhumient pra «spravazdačnaść» prosta vydumany kedebistami.
Niekatoryja ludzi dapamahali tolki hrašyma. Častka dapamahała tym, što atrymlivała hrošy ad fondaŭ, dyjaspary abo prosta siabroŭ z-za miažy, a paśla pierasyłała hrošy siemjam ci samim viaźniam.
Inšaja častka sistematyčna pierasyłała ŭłasnyja hrošy, prynamsi ŭ adnym vypadku — z zamiežnaj kartki. Niahledziačy na toje, što heta byli ŭłasnyja srodki, ludzi apynulisia za kratami.
Va ŭsich viadomych vypadkach dapamoha palitviaźniam traktujecca jak «sadziejničańnie ekstremisckaj dziejnaści». Na niekatorych z tych, chto apynuŭsia ŭ SIZA, «vyjšli» paśla prahladu elektronnych nośbitaŭ inšych zatrymanych. Taksama častka zatrymanych zachoŭvała ŭ telefonie prahramu mabilnaha bankinha zamiežnaha banka, ź jakoha dapamahała viaźniam, i «pahareła» na hetym.
Viadoma taksama, što paśla abłavy KDB niekatoryja ludzi apynulisia za kratami pa inšych artykułach. Naprykład, adnu z zatrymanych užo ŭ KDB «prabili» pa bazach MUS i zrabili abvinavačanaj va ŭdziele ŭ pratestach. Viadomy jak minimum jašče adzin padobny vypadak. Abiedźviuch žančynaŭ vyrašyli zatrymać, imavierna, paśla prahladu bazaŭ zamovaŭ «Jeŭraopta».
Nam viadomyja imiony jašče niekalkich čałaviek, jakija ciapier u SIZA, ale ichnija imiony niepubličnyja, bo tak chočuć svajaki. Takim čynam, my viedajem pra dziesiać čałaviek, jakija paśla abłavaŭ dahetul za kratami, ale ich moža być našmat bolej.
Jak nie patrapić pad represii za salidarnaść?
Prostaha adkazu niama. Bolšaść formaŭ salidarnaści tak ci inačaj možna adsačyć, a KDB zładziŭ hetuju ataku dziela taho, kab biełarusy bajalisia dapamahać adno adnamu i stracili davier da inicyjatyvaŭ dapamohi. Ale jość niekalki paradaŭ.
Pa-pieršaje, na siońnia kryminalizujecca sistemnaja dapamoha viaźniam, navat pryvatna i z ułasnych srodkaŭ. Tamu vy možacie dapamahać naŭprost siemjam palitviaźniaŭ najaŭnymi hrašyma. Važna taksama vyčyščać pierapiski ź imi. Tak imaviernaść, što vas adsočać, našmat źmianšajecca.
Pa-druhoje, kali vy karystajeciesia zamiežnaj kartkaj i žyviacie ŭ Biełarusi, to nie zachoŭvajcie jaje doma. Kali vy jeździcie ŭ Biełaruś, to vydalicie bankaŭskuju prahramu i pakińcie kartku za miažoj. Bo nieviadoma, što moža być abjaŭlena «złačynstvam» u nastupny raz.
Pa-treciaje, pastarajciesia paznačać jak maha mienš svaich źviestak abo źviestak inšaha čałavieka pry roznych apieracyjach. Naprykład, dla pieravodaŭ u SIZA abo pryvatna čałavieku nieabaviazkova paznačać realnaje imia adpraŭnika, dastatkova tolki imia atrymalnika, a płacić možna najaŭnymi na pošcie.
Toje samaje možna rabić i ź inšymi servisami, śviadoma paznačajučy niesapraŭdnyja źviestki paŭsiul, dzie heta mahčyma. Taksama bolš biaśpiečna zabirać niešta z punktaŭ vydačy, a nie zamaŭlać na ŭłasny adras, a kali mahčyma, to i paznačać vydumanaje imia atrymalnika — heta abaronić vas taksama ad uciečak, jakija zdarajucca ŭ kramach i servisach dastaŭki. Ahułam takija dziejańni ŭskładniać analiz źviestak navat u vypadku, kali KDB ich zapatrabuje.
Čytajcie taksama: