Niki Chejli ŭpieršyniu pieramahła Trampa na prajmieryz
4.03.2024 / 7:59
Supiernica Donalda Trampa na vybarach ad Respublikanskaj partyi atrymała pieršuju simvaličnuju pieramohu ŭ sieryi prajmieryz i kokusaŭ — jana sabrała bolšaść hałasoŭ u stalicy ZŠA Vašynhtonie i akruzie Kałumbija.
Niki Chejli. Fota: Matt Kelley / AP
Za Chejli ŭ staličnaj akruzie prahałasavali amal 63% respublikancaŭ, za Trampa — 33%, piša Bi-bi-si.
Chejli atrymaje hałasy ŭsich 19 vybarščykaŭ ad akruhi Kałumbija, i ŭ jaje ŭsiaho na rachunku 43 vybarščyki. U Trampa ich 247, a ŭsiaho padčas prajmieryz i kokusaŭ respublikancy vybirajuć 2429 delehataŭ na źjezd partyi, jaki ŭ lipieni aficyjna abvieścić kandydata ŭ prezidenty.
Pieradvybarčy štab Trampa zajaviŭ, što nie ździŭleny pieramohaj Chejli ŭ «bałocie», jak eks-prezident i jaho paśladoŭniki nazyvajuć Vašynhton.
«Niki rašuča adchilenaja pa ŭsioj Amierycy, ale łabisty i insajdary akruhi Kałumbija, jaki chočuć zachavać pravalny status-kvo, tolki što abviaścili jaje karalevaj bałota», — havorycca ŭ zajavie štaba Trampa.
Pres-sakratar Niki Chejli Alivija Pieres-Kubas skazała: «Nie dziŭna, što respublikancy, jakija bližej za ŭsio bačać niepaładki ŭ Vašynhtonie, adprečvajuć Donalda Trampa i chaos, jaki jon niasie».
Donald Tramp upeŭniena vyjhraŭ usie papiarednija prajmieryz i kokusy, u tym liku ŭ rodnym štacie Niki Chejli, Paŭdniovaj Karalinie, a ŭ hety aŭtorak spadziajecca faktyčna harantavać sabie vyłučeńnie kandydatam u prezidenty.
5 sakavika, u «supieraŭtorak», prajmieryz i kokusy abiedźviuch viadučych partyj projduć adrazu ŭ 15 štatach i na adnoj zamorskaj terytoryi. U respublikancaŭ vyrašycca los hałasoŭ adrazu 874 vybarščykaŭ. Štab Trampa pradkazvaje, što jon atrymaje jak minimum 773 ź ich.
«Analityki ličać, što Niki Chejli praciahvaje baraćbu ŭ asnoŭnym u raźliku na toje, što Trampa prymusiać syści jaho prablemy z zakonam abo inšyja abstaviny, naprykład, drennaje zdaroŭje», — zaŭvažaje ahienctva AFP.
Čytajcie taksama:
Tramp vyjhraŭ kokusy ŭ troch štatach
U Trampa zastałasia tolki adna supiernica pierad vybarami-2024. Chto takaja Niki Chejli?