Зяленскі: Украінскім войскам удалося стрымаць расійскі наступ
Аднак Украіна не гатовая будзе стрымаць новы буйны расійскі наступ, які можа адбыцца ў канцы вясны ці летам, без дадатковай дапамогі, кажа прэзідэнт Украіны,
30.03.2024 / 07:53
Фота: president.gov.ua
Прэзідэнт Украіны Уладзімір Зяленскі заявіў у інтэрв'ю CBS News, што нягледзячы на дэфіцыт боепрыпасаў і іншага вайсковага абсталявання, украінскім войскам удалося стрымаць расейскі наступ і стабілізаваць сітуацыю на фронце, паведамляе Бі-бі-сі.
Аднак, са слоў украінскага лідара, Украіна не гатовая будзе стрымаць новы буйны расійскі наступ, які можа адбыцца ў канцы вясны ці летам, без дадатковай дапамогі.
Інтэрв'ю было запісана на фоне разбураных будынкаў у месцы, дэталі якога не раскрываюцца.
«Мы стабілізавалі сітуацыю. Яна лепш, чым была два-тры месяцы таму, калі ў нас быў вялікі дэфіцыт артылерыйскіх боепрыпасаў, розных відаў узбраенняў», — сказаў ён.
На пытанне аб тым, ці можна выйграць вайну, пакуль ва ўладзе ў Расіі знаходзіцца Уладзімір Пуцін, Зяленскі адказаў, што гэта велізарны выклік, але з кожнай адбітай у праціўніка вёскай рэжым Пуціна слабее, і Кіеву, магчыма, не давядзецца вызваляць усе акупаваныя тэрыторыі выключна вайсковым шляхам.
«Я ўпэўнены, што калі Пуцін страціць тыя тэрыторыі, якія ён кантралюе з 2022 года, ён страціць давер нават тых краін, якія да гэтага часу сумняваюцца, падтрымліваць Украіну ці не, — сказаў прэзідэнт Украіны. — Ён таксама страціць уладу ў сваёй краіне. Як толькі гэта адбудзецца, ён будзе гатовы да дыялогу. І тады абавязковай міжнароднай умовай для міру павінна стаць вызваленне ўсіх нашых тэрыторый, тэрытарыяльная цэласнасць Украіны».
Чытайце таксама:
З надыходам лета Расія можа рыхтаваць новы буйны наступ
У ЗША сталі менш баяцца, што перадача ATACMS Украіне расцвяліць Пуціна
Галоўнакамандуючы УСУ пра «мабілізацыю 500 тысяч»: Пасля аўдыту гэтая лічба істотна зменшаная