У мінскіх кавярнях сёлета зробяць больш летніх тэрас
Улады Мінска ўзгаднілі адкрыццё сёлета 608 летніх тэрас каля кавярняў. У 2023-м іх працавала ўсяго 524, паведамляе агенцтва «Мінск-Навіны» са спасылкай на начальніка галоўнага ўпраўлення гандлю і паслуг Мінгарвыканкама Алену Нагорную.
08.04.2024 / 19:22
«Летнія тэрасы як працяг залаў кавярняў, бараў і рэстаранаў, карыстаюцца папулярнасцю ў наведвальнікаў, таму такая форма гандлю развіваецца.
Прыродная вясна ў гэтым годзе пачалася рана, таму суб'екты гаспадарання ўжо вядуць падрыхтоўку да адкрыцця летніх тэрас. 320 летніх кавярняў запрацуюць да 15 красавіка, астатнія 288 адкрыюцца да 1 траўня», — сказала Нагорная на нарадзе ў Мінскім гарвыканкаме.
Чыноўніца ўдакладніла, што найбольшая колькасць летніх тэрас засяроджаная ў цэнтры горада і ўздоўж асноўных праспектаў.
Старшыня Мінгарвыканкама Уладзімір Кухараў, у сваю чаргу, даручыў прапрацаваць пытанне адкрыцця летніх тэрас і ў спальных раёнах.
«У горадзе хапае добрых месцаў, не толькі ў цэнтры, дзе можна ўладкаваць тэрасы для адпачынку жыхароў», — сказаў ён, адзначыўшы таксама, што на ўсіх летніх тэрасах у сталіцы павінна быць годнае кветкавае афармленне.
Чытайце таксама:
Першую ў Беларусі пешаходную вуліцу рэканструююць
У дворыку Pinky Bandinsky зрабілі адну з самых казачных тэрас Мінска ФОТА
Ля гатэля «Еўропа» ў Мінску паставілі тэрасы ў выглядзе карэт