Advakaty prapanujuć adpravić Hirkina-Strałkova na vajnu va Ukrainu
10.04.2024 / 14:12
Nibyta adna z vajskovych častak užo hatova zaklučyć kantrakt z byłym «ministram abarony» DNR.
Ihar Hirkin-Strałkoŭ. AP Photo/Alexander Zemlianichenko, Pool
Abarona byłoha «ministra abarony» DNR Ihara Strałkova (Hirkina), jaki atrymaŭ čatyry hady kałonii pavodle spravy ab ekstremiźmie (č.2 art. 280 KK), paprosić nakiravać jaho na vajskovuju słužbu ŭ adnu z vajskovych častak u zonie «śpiecyjalnaj vajskovaj apieracyi» (tak u Rasii nazyvajuć ahresiju suprać Ukrainy), paviedamiŭ RBK jahony advakat Alaksandr Mołachaŭ.
Advakaty ŭ kancy studzienia abskardzili prysud Strałkovu. Jak paviedamiŭ Mołachaŭ, sudovaje pasiadžeńnie pa kryminalnaj spravie projdzie ŭ pieršym apielacyjnym sudzie ahulnaj jurysdykcyi ŭ Maskvie 15 maja.
Da apielacyjnaj skarhi Mołachava prykładzieny dakumient, jaki paćviardžaje zhodu adnoj z vajskovych častak na terytoryi DNR na zaklučeńnie kantraktu z Hirkinym.
«Abarona ličyć, što, niahledziačy na pryniaćcie Dziarždumaj niadaŭna zakona, jaki zabaraniaje adpraŭku na front asudžanych pa ekstremisckich artykułach, pravavaja mahčymaść dla zaklučeńnia vajennaha kantraktu sa Strałkovym isnuje», — paviedamiŭ Małochaŭ.
Jana nastupić, kali sud apielacyjnaj instancyi admienić prysud, albo kali prezident Rasii vyrašyć pamiłavać asudžanaha i źniać ź jaho sudzimaść, na što maje prava ŭ adpaviednaści z Kanstytucyjaj.