ZŠA abmiežavali pieramiaščeńni dypłamataŭ u Izraili. Brytanija i Rasija rekamiendujuć hramadzianam nie jeździć u rehijon
Na Blizkim Uschodzie napružana čakajuć adkazu Irana na ŭdar pa iranskim konsulstvie ŭ Damasku, u jakim Tehieran abvinavačvaje Izrail. ZŠA, Brytanija, Rasija i inšyja krainy abmiažoŭvajuć pieramiaščeńni dypłamataŭ pa Izraili i rekamiendujuć svaim hramadzianam nie jeździć ciapier u rehijon.
12.04.2024 / 12:38
Ultraartadaksalnyja jaŭrejskija mužčyny pratestujuć suprać pryzyvu ŭ vojska ŭ Jerusalimie. Fota: Ohad Zwigenberg / AP
Vašynhton rasparadziŭsia, kab supracoŭniki ambasady ZŠA ŭ Izraili i čalcy ich siemjaŭ abmiežavali pieramiaščeńni pa krainie, piša Bi-bi-si.
Supracoŭnikam amierykanskaj ambasady zabaroniena vyjazdžać za miežy Tel-Aviva (uklučajučy Hiercliju, Nietaniju i Evien-Jechudu), Jerusalima i Bieer-Ševy. Heta abmiežavańnie, jak havorycca na sajcie pasolstva, dziejničaje «da dalejšaha paviedamleńnia».
«Amierykanskija aficyjnyja asoby papiaredžvajuć, što z adkazam Irana pytańnie nie ŭ tym, ci budzie jon, a tolki ŭ tym, kali budzie», — adznačaje karespandent Bi-bi-si na Blizkim Uschodzie Chjuha Bačeha.
MZS Vialikabrytanii taksama zajaviła pra «mahčymaść napadu na Izrail z boku Irana». Vialikabrytanija papiaredžvaje svaich hramadzian pra ryzyki pry pajezdkach u Izrail z kastryčnika minułaha hoda, kali na Izrail byŭ ździejśnieny napad bajevikoŭ «CHAMAS».
Rasijskaje MZS rekamiendavała rasijanam nie jeździć ciapier u Izrail, Livan, na paleścinskija terytoryi i naohuł u hety rehijon.
«Nastojliva raim rasijskim hramadzianam ustrymacca ad pajezdak u rehijon, asabliva ŭ Izrail, Livan i na Palestynskija terytoryi, za vyklučeńniem vypadkaŭ krajniaj nieabchodnaści», — cytujuć ahienctvy aficyjnaha pradstaŭnika MZS Maryju Zacharavu.
Pry hetym Iardanii rekamiendacyja nie tyčycca: pa słovach Zacharavaj, MZS ličyć, što «pieranos bajavych dziejańniaŭ ź siektara Haza na terytoryju Karaleŭstva» ciapier małavierahodny.
Ničoha Zacharava nie skazała i pra pajezdki ŭ Iran.
Avijakampanija Lufthansa padoŭžyła prypynieńnie palotaŭ u Tehieran da suboty, 13 krasavika.
U minułuju niadzielu, 7 krasavika, Tehieran zajaviŭ, što ciapier — paśla napadu na konsulstva Irana ŭ Siryi — pasolstvy Izraila nie mohuć ličycca biaśpiečnym miescam.
Padčas avijaŭdaru pa Damasku nibyta zabili iranskaha hienierała
Bajden: U vypadku napadu Irana naša padtrymka Izraila budzie žaleznaj
U Izraili tysiačy ludziej vyjšli na pratest suprać premjer-ministra
Lidar CHAMAS zajaviŭ pra hibiel svaich synoŭ u vyniku avijaŭdaru