Магілёўскіх студэнтаў палохаюць спісам «экстрэмісцкіх» рэсурсаў, але ёсць адно «але»
Прапагандысты прапануюць ім выкарыстоўваць браўзэрнае пашырэнне «Стоп экстрэмізм», якое насамрэч з'яўляецца траянам.
26.04.2024 / 13:28
Ілюстрацыйнае фота «Наша Ніва»
Так званыя «інфармацыйныя гадзіны» пад наглядам куратараў першакурснікаў ужо прайшлі ў Магілёўскім універсітэце харчовых і хімічных тэхналогій, у Горацкай сельгасакадэміі і ў ячэйках дзяржпрафсаюзаў па ўсёй Магілёўскай вобласці, піша Mayday.team
Лекцыю пад назвай «Фэйкі: як разабрацца ў праўдзівасці інфармацыі» праводзіць загадчыца аддзялення інфармацыйнага маніторынгу і аналітыкі так званага «Магілёўскага абласнога інфацэнтра» (па сутнасці, гэта прапагандысцкія «Магілёўскія ведамасці») Алена Шэпелева. Раней Шэпелева працавала загадчыкам аддзела маркетынгу Гарадской бібліятэкі імя Карла Маркса, але ў 2021 годзе атрымала гарадскую прэмію «Дасягненне» і пайшла ў прапагандысты.
Цяпер яна расказвае моладзі пра «пералік дакладных дзяржаўных крыніц інфармацыі» і палохае спісам «экстрэмісцкіх» рэсурсаў, за прагляд якіх можна трапіць у турму. Яна настойліва рэкамендуе студэнтам і рабочай моладзі карыстацца створаным сілавікамі ў сакавіку гэтага года браўзерным пашырэннем «Стоп экстрэмізм», якое павінна папярэджваць карыстальнікаў, што рэсурсы, якія адкрываюцца, унесены ў спіс экстрэмісцкіх матэрыялаў.
Аднак IT-адмыслоўцы высветлілі, што пры ўстаноўцы пашырэння частка карыстачоў Windows выяўляе ў архіве траян Wacatac, гэта значыць, шкоднасную праграму, якая можа загружаць і ўсталёўваць іншыя праграмы альбо запісваць націскі клавіш.
Сілавікі выпусцілі пашырэнне для браўзэра «Стоп экстрэмізм». Вось чаму яго трэба сцерагчыся