Мінская бальніца застанецца ў карпусах уніяцкага манастыра XVIII стагоддзя

Сталічныя ўлады адмовіліся ад ідэі пераносу бальніцы і адкрыцця ў гістарычных збудаваннях этнаграфічнага цэнтра.

22.01.2010 / 01:25

У бліжэйшы час другая гарадская бальніца Мінска закрыецца на рэканструкцыю. Пасля рэмонту медыцынская ўстанова зноў запрацуе ў старых будынках.

Карпусы 2-ой гарадской бальніцы Мінска знаходзяцца насупраць Траецкага прадмесця ў будынках XVIII i XIX стагоддзя, у якіх стагоддзі таму існаваў уніяцкі Траецкі манастыр базільянак.

Летась сталічныя ўлады агучылі ідэю — перанесці бальніцу ў Паўночны пасёлак, каля Навінак, а шэры і нягеглы будынак бальніцы знесці.

У гістарычных збудаваннях мелася адкрыць гасцініцу і этнаграфічны цэнтр.

Цяпер ад ідэі адмовіліся. Паколькі мінскія бальніцы маюць патрэбу ў павелічэнні койка-месцаў, будзе пабудаваны яшчэ адзін шпіталь. Але і 2-ая гарадскай бальніца не скончыць сваёй працы пасля рэканструкцыі.

Ягор Марціновіч