Namieśnik kiraŭnika HUR: Ukraina nie zmoža pieramahčy Rasiju tolki na poli boju
Sa słoŭ Vadzima Skibickaha, u najbližejšyja miesiacy Rasija prymienić «trochuzroŭnievy płan» destabilizacyi Ukrainy, jaki ŭklučaje ŭ siabie maštabny nastup na pazicyi USU i dezinfarmacyjnuju kampaniju ŭnutry krainy.
03.05.2024 / 08:10
Źniščany Časaŭ Jar, za jaki viaducca bai ŭžo niekalki miesiacaŭ. Fota: Policía de patrullas de Ucrania via AP
Kijeŭ čakaje maštabnaje nastupleńnie rasijskich sił na froncie ŭ najbližejšyja miesiacy, zajaviŭ u intervju časopisu The Economist, apublikavanym u čaćvier, 2 traŭnia, namieśnik kiraŭnika Hałoŭnaj upravy vyviedki (HUR) Minabarony Ukrainy Vadzim Skibicki. Pavodle jahonych prahnozaŭ, užo ŭ traŭni vojska RF pojdzie ŭ nastup na ŭschodzie, paśla čaho pačnie naroščvać svaje siły ŭ Charkaŭskaj i Sumskaj abłaściach.
Zdaču Časava Jara — apornaha punkta USU ŭ Danieckaj vobłaści — vysokapastaŭleny hienierał nazvaŭ «pytańniem času», piša Deutsche Welle
Skibicki adznačyŭ, što na hety momant Rasija maje ahułam 514 tysiač vajskoŭcaŭ suchaputnych vojskaŭ i płanuje pašyrać kolkaść asabistaha składu šlacham pryciahnieńnia reziervaŭ.
U svaju čarhu USU, pa słovach namieśnika kiraŭnika HUR, pakutujuć ad kadravaha hoładu i niedachopu ŭzbrajeńniaŭ.
«Projduć tydni, pierš čym dapamoha ZŠA dabiarecca da linii frontu. Naŭrad ci jana zmoža paraŭnacca z rasijskimi zapasami snaradaŭ abo zabiaśpiečyć efiektyŭnuju abaronu ad nietechnałahičnych i razburalnych kiravanych avijabombaŭ Rasii», — zajaviŭ Vadzim Skibicki.
Akramia taho, u Kijevie čakajuć naroščvańnia Maskvoj dezinfarmacyjnaj kampanii ŭnutry Ukrainy, nakiravanaj na padryŭ ukrainskaj mabilizacyi i palityčnaj lehitymnaści Uładzimira Zialenskaha.
Źmiastoŭnyja pieramovy pačnucca nie raniej za druhuju pałovu 2025 hoda
Na dumku Skibickaha, Ukraina nie zmoža vyjhrać vajnu z RF tolki na poli boju, navat kali USU ŭdasca adkinuć rasijskija vojski da miežaŭ.
«Heta nie pakłała b kaniec vajnie. Takija vojny mohuć skončycca tolki damoŭlenaściami», — padkreśliŭ hienierał, dadaŭšy, što źmiastoŭnyja pieramovy pačnucca nie raniej za druhuju pałovu 2025 hoda, kali vajskovy vytvorčy patencyjał RF značna skarocicca praź niedachop materyjałaŭ i inžynieraŭ.
Namieśnik kiraŭnika HUR adznačyŭ, što Kijeŭ u lubym vypadku maje namier praciahnuć baraćbu, ale jaje zychod zaležyć nie tolki ad Ukrainy, ale i ad jeŭrapiejskich partnioraŭ.
Sa słoŭ Skibickaha, kali krainy ES nie znojduć sposab dalejšaha pavieličeńnia abaronnaj vytvorčaści, kab dapamahčy Ukrainie, jany ŭ vyniku taksama apynucca pad prycełam Rasii.
Časaŭ Jar. Čamu rasijanam tak važna zachapić hety horad
Rasijanie praciahvajuć prasoŭvacca ŭ Danieckaj vobłaści
Rasijskija vajskoŭcy zajavili pra zachop čarhovaha miastečka na Danbasie