Свет

У Грэцыі суд апраўдаў журналіста, які раскрыў «таямніцу» сыходжання Жыватворнага агню

Суд у Афінах апраўдаў грэчаскага журналіста, які выкрыў цырымонію з'яўлення Жыватворнага агню ў Ерусаліме. Суд вынес рашэнне 29 сакавіка, піша РБК на падставе паведамленняў грэчаскай прэсы.

Цырымонія сыходжання Жыватворнага агню ў Іерусаліме 4 мая 2024 года. Фота: AP Photo/Ohad Zwigenberg

У 2018 годзе грэчаскі журналіст Дзімітрыс Алікакас паехаў у Іерусалім, каб даследаваць старажытны рытуал сыходжання Жыватворнага агню. На месцы Алікакас узяў інтэрв'ю ў некалькіх святароў, у тым ліку ў адказнага за рытуальныя прадметы — свечкі, якія нясуць у сабе Жыватворны агонь — храма Труны Гасподняй архіепіскапа Ісідара.

Архіепіскап у размове з журналістам расказаў, што агонь запальваюць з дапамогай запальнічкі. Інтэрв'ю з ім увайшло ў кнігу Алікакаса «Адкупленне. Справа аб Жыватворным агні», якая выйшла ў 2019 годзе.

Пасля гэтага Іерусалімскі патрыярхат падаў судовы пазоў на адрас журналіста і абвінаваціў яго ў паклёпе. Прадстаўнікі царквы настойвалі, каб Алікакас выдаліў відэа з архіепіскапам Ісідарам з інтэрнэту. Але суд стаў на бок журналіста.

Сыходжанне Жыватворнага агню адбываецца напярэдадні Вялікадня. Абрад сустрэчы агню праводзяць меркавана з IV стагоддзя. 4 мая 2024 года, напярэдадні праваслаўнага Вялікадня, па традыцыі цырымонія прайшла ў Іерусаліме ў Кувукліі, мармуровай капліцы над пячорай Труны Гасподняй. Пазней агонь развозяць па ўсім свеце. 

Каментары да артыкула