U kandydata ŭ prezidenty ZŠA ŭ hałavie znajšli parazita. Jon moh źjeści častku mozhu
Niezaležny kandydat u prezidenty ZŠA ŭ svajoj kampanii robić staŭku na mocnaje zdaroŭje. Ale 12 hadoŭ tamu Robiert Frensis Kienedzi raskazvaŭ u sudzie pra čarviaka ŭ svajoj hałavie.
08.05.2024 / 20:33
Robiert F. Kieńniedi. Foto: AP Photo/Richard Vogel
U pakazańniach padčas šlubarazvodnaha pracesu Kienedzi raskazvaŭ, što ŭ jaho jość kahnityŭnyja prablemy i prablemy z pamiaćciu. Jon naviedaŭ niekalkich nieŭrołahaŭ, prajšoŭ šerah abśledavańniaŭ. Lekary nie znajšli puchliny, ale zatoje ŭbačyli na zdymku dziŭnuju plamu, piša The New York Times.
Śpiecyjalist patłumačyŭ Kienedzi, što heta moža być čarviak, jaki źjeŭ častku mozhu i pamior prosta ŭ hałavie. Tady ž juryst i palityk pakutavaŭ ad atručvańnia rtućciu, jakoje vyklikaje padobnyja simptomy. U sudzie Kienedzi skardziŭsia, što prablemy z pamiaćciu niehatyŭna paŭpłyvali na jahonuju zdolnaść zarablać hrošy.
Pres-sakratar kampanii Kienedzi raskazaŭ vydańniu Business Insider, što palityk moh zarazicca parazitam padčas pajezdak pa Afrycy, Paŭdniovaj Amierycy i Paŭdniova-Uschodniaj Azii ŭ ramkach prahram pa abaronie navakolnaha asiarodździa. Pry hetym u štabie Kienedzi śćviardžajuć, što prablema z parazitam była vyrašanaja 10 hadoŭ tamu, i zaraz z palitykam usio vydatna. Sam kandydat u prezidenty taksama niadaŭna raskazvaŭ presie, što prablem z pamiaćciu ŭ jaho ciapier niama.
Adnak žurnalisty daviedalisia, što ŭ palityka i člena viadomaj palityčnaj dynastyi jość inšyja prablemy sa zdaroŭjem: jaho niekalki razoŭ špitalizavali praź fibrylacyju pieradserdziaŭ, heta značyć parušeńni sardečnaha rytmu. Adnojčy lekary byli vymušanyja vykarystać defibrylatar, kab viarnuć rytm u normu.
Pry hetym ironija situacyi ŭ tym, što adnym z klučavych tezisaŭ pieradvybarnaj kampanii Kenedzi źjaŭlajecca jahonaje mocnaje zdaroŭje. Pijarščyki 70-hadovaha palityka farmulujuć kantrast pamiž Kienedzi i jahonymi supiernikami — 81-hadovym prezidentam Džo Bajdenam i 77-hadovym eks-prezidentam Donaldam Trampam.
Robiert Frensis Kienedzi-małodšy — syn byłoha hienprakurora ZŠA Robierta Frensisa Kienedzi i plamieńnik byłoha prezidenta Džona Kienedzi. Juryst, ekaaktyvist i adzin ź lidaraŭ antypryščepačnaha ruchu płanavaŭ udzielničać u prajmieryz Demakratyčnaj partyi, adnak usio ž vyrašyŭ bałatavacca ŭ jakaści niezaležnaha kandydata.
Rejtynhi pakazvajuć, što Kienedzi nie zmoža skłaści kankurencyju kandydatam ad demakrataŭ i respublikancaŭ, adnak jon zdolny paŭpłyvać na vynik vybaraŭ u klučavych štatach, jakija vahajucca.
Vybary prezidenta ZŠA projduć 5 listapada.
Kali Tramp vyjhraje vybary, chto stanie vice-prezidentam?
Tramp hatovy ŭchvalić finansavuju dapamohu Ukrainie, ale pry peŭnaj umovie
Voś jak Fukujama tłumačyć fienomieny Pucina i Trampa