МТС з 15 мая мяняе ўмовы доступу ў інтэрнэт

З 15 мая МТС будзе ацэньваць выкарыстанне мабільнага інтэрнэту з боку карыстальнікаў.

Калі ў кампаніі з'явяцца падставы меркаваць, што чалавек выкарыстоўвае паслугу «нядобрасумленна», то яму парэкамендуюць знізіць спажыванне інтэрнэт-трафіку. У выпадку, калі кліент праігнаруе паведамленне, то кампанія МТС можа «скарэктаваць хуткасць інтэрнэт-трафіку да канца месяца».

Мабільны аператар тлумачыць, што такое новаўвядзенне закране тых, хто выкарыстоўвае больш за 100 ГБ інтэрнэту і не выконвае патрабаванні ўказаў Лукашэнкі «Аб мерах па ўдасканаленні выкарыстання нацыянальнага сегмента сеткі Інтэрнэт» і «Аб удасканаленні парадку перадачы паведамленняў электрасувязі».

Акрамя таго, з 15 мая істотна падаражэюць паслугі для фізічных асоб і кампаній. У прыватнасці, павысіцца кошт роўмінгу, міжнароднай сувязі, а таксама іншых сэрвісных паслуг.

Падаражэе і фіксаваны інтэрнэт для фізічных ды юрыдычных асоб. Напрыклад, цяпер тарыф «Хатні Канэкт 4» каштуе 31 рубель у месяц, але ўжо з 15 траўня давядзецца заплаціць амаль на траціну больш — 42 рублі. Больш стануць каштаваць і іншыя паслугі па наданні інтэрнэту.