Nataryus admoviŭsia rabić davieranaść dla biełarusa sa śpisu «terarystaŭ». Toj paskardziŭsia ŭ sud
Mužčynu asudzili pavodle niekalkich artykułaŭ — u tym liku za terakt. Jon adbyvaje pakarańnie. Źniavoleny źviarnuŭsia da nataryusa, kab skłaści davieranaść na advakata i žonku. Jamu admovili praz toje, što mužčynu ŭnieśli ŭ śpis «terarystaŭ», raskazvaje Hrodna.life.
18.05.2024 / 08:37
Biełarusa asudzili za raspalvańnie sacyjalnaj varožaści, terakt, sadziejničańnie terarystyčnaj i ekstremisckaj dziejnaści (art. 130, art. 289, art. 290−2, č.4 art. 361 KK). Paśla prysudu jaho ŭnieśli ŭ pieralik fizičnych asob, jakija majuć dačynieńnie da terarystyčnaj dziejnaści.
Heta i stała pryčynaj admovy ŭ afarmleńni davieranaści. Nataryus paličyŭ, što vysokaja ryzyka taho, što budučyja ździełki buduć źviazanyja ź finansavańniem teraryzmu. Biełarus ža chacieŭ zrabić davieranaść na advakata, kab jon pradstaŭlaŭ jaho intaresy ŭ sudzie. I na žonku — kab jana mahła źniać z uliku ich transpart, rasparadžacca nieruchomaściu i padaryć jaje dačce.
Biełarus vyrašyŭ abskardzić admovu nataryusa. Mužčyna śćviardžaje, što jana — niezakonnaja, bo pieradača paŭnamoctvaŭ nie źviazanaja ź lehalizacyjaj «złačynnych» dachodaŭ i finansavańniem teraryzmu.
Spravu razhladali 24 krasavika ŭ sudzie Leninskaha rajona Hrodna. Asudžanaha tudy nie dastavili. Sud staŭ na bok nataryusa — paličyŭ, što ryzyki finansavańnia teraryzmu pry ździełkach sapraŭdy vysokija. A pasłuhami pradstaŭnika, to-bok advakata, jon i tak moža karystacca.