Зноў цэлую групу людзей у Брэсце асудзілі за ўдзел у пратэстах 2020 года
Маскоўскі суд Брэста разглядаў крымінальную справу супраць 5 чалавек: Маргарыты Атэмасавай, Ганны Васільевай, Арцёма Ботава, Андрэя Салапуры і Аляксандра Якубука. Усіх іх абвінавачвалі паводле ч. 1 арт. 342 КК (групавое парушэнне грамадскага парадку), паведамляе «Берасцейская вясна».
28.05.2024 / 19:14
Маргарыта Атэмасава і Андрэй Салапура. Фота з сацыяльных сетак
Усім 5 людзям ставілі ў віну ўдзел у пратэстах 10 жніўня 2020 года ў Брэсце. У выніку Ботаву, Салапуру і Якубуку прысудзілі кожнаму па паўтара года калоніі, Атэмасавай — 2 гады пазбаўлення волі ўмоўна, паколькі жанчына мае вельмі маленькае дзіця (якому менш за год), Васільевай -2 гады 6 месяцаў «хатняй хіміі», бо ў жанчыны двое непаўналетніх дзяцей.
Ролю суддзі выконвала Марына Скалковіч.
Такім чынам, ужо вядома пра 25 асуджаных паводле арт. 342 КК за пратэсты ў Брэсце, якія праходзілі 10 жніўня 2020 года. За гэтую акцыю пратэсту актыўна судзілі ў 2021 годзе, тады ўсім прысуджалі калонію паводле артыкула 293 КК, і праваабаронцы прызналі абсалютна ўсіх асуджаных палітвязнямі.
Пасля некаторага зацішша ў канцы 2023 года з'явіліся новыя затрыманні за тыя пратэсты — улады пачалі прад'яўляць ужо артыкул 342 КК — за тое, што 10 жніўня 2020 года людзі ў Брэсце «выкрыквалі лозунгі, выходзілі на праезную частку».
Прадпрымальніка, якога затрымалі па вяртанні з-за мяжы, асудзілі да дзевяці гадоў калоніі за данаты
У Магілёве будуць судзіць мастачку, якая зняла відэа на выбарчым участку