Čamu 31-hadovaha dyrektara «Lehmaša» na sustreču z Łukašenkam apranuli ŭ formu?
Zavod «Lehmaš» u minułym vypuskaŭ šviejnyja mašyny. Ciapier na zavodzie adlivajuć kazany i patelni, ale nie tolki. Ale ź siakierami źviazanyja płany pradpryjemstva.
29.05.2024 / 12:56
Dźmitryj Pantus (źleva), Alaksandr Łukašenka i dyrektar «Lehmaša» Uładzisłaŭ Paŭlenka (sprava ad Łukašenki) na zavodzie «Lehmaš» u Oršy 29 maja 2024 hoda. Skrynšot z TH-kanała Puł piervoho
Siońnia Alaksandr Łukašenka naviedaŭ zavod «Lehmaš» u Oršy. Źviarnuli ŭvahu kadry: jon staić na pradpryjemstvie, jakoje pačynałasia z vytvorčaści šviejnych mašyn siarod ludziej u formie.
Čałaviek, źleva, u formie, z puzikam — heta 41-hadovy Dźmitryj Pantus, kiraŭnik Dziaržaŭnaha vajskova-pramysłovaha kamiteta, jaki kiruje pradpryjemstvami biełaruskaha VPK.
A maładoha čałavieka mnohija, mabyć, bačać upieršyniu. Heta 31-hadovy Uładzisłaŭ Paŭlenka, dyrektar zavoda. Čamu jon u formie?
Adkaz na hetaje pytańnie daje asartymient pradukcyi pradpryjemstva. Na stale pierad Łukašenkam, Pantusam i Paŭlenkam — tarmaznyja kołcy vialikija, małyja i padcisknyja dla rasijskaha RSZA «Hrad».
A na fota z pradpryjemstva bačym i korpusy dla artyleryjskich snaradaŭ. Takim čynam, zavod «Lehmaš» ciapier pracuje na vajnu.
Alaksandr Łukašenka pastaviŭ pierad pradpryjemstvam zadaču zachavać i naroščvać vypusk pradukcyi mirnaha pryznačeńnia razam z zasvajeńniem vytvorčaści novych vyrabaŭ dla VPK.
«Jon pavinien heta vypuskać i naroščvać. Jak jany buduć heta rabić — heta ich pytańnie. Pa načach, jašče niejak..»
Da vajny ŭ Oršy šyli tekstylnyja stropy, adlivali prostyja mietałavyraby, ad hajek da dymavych trub i navat adlivali čyhunnyja patelni i kazany.
Alaksandru Łukašenku taksama padaryli kazan dla płovu, a nie bałvanku snarada.
Uładzisłaŭ Paŭlenka — małady pa biełaruskich mierkach dyrektar, pryjšoŭ na «Lehmaš» u 2023 hodzie ź viciebskaha «Viciazia», dzie jon ź inžyniera-technołaha vyras u hałoŭnyja inžyniery. U apošnija hady luboha čałavieka pierad pryznačeńniem na dyrektarskuju pasadu staranna praviarajuć na palityčnuju łajalnaść.
Vizit Alaksandra Łukašenki na zavod «Lehmaš» u Oršy pakazaŭ stupień pieraaryjentacyi biełaruskaj pramysłovaści na vajennyja patreby.
Rost abjomaŭ vytvorčaści biełaruskaj pramysłovaści ŭ 2023—2024 źviazany ŭ tym liku z pavieličeńniem zakazaŭ rasijskaha VPK. Na vypusk vajskovaj pramysłovaści pierajšoŭ «Homsielmaš» i inšyja pradpryjemstvy.
{POLL#1242}