Žychary šmatpaviarchovika ŭ Minsku ŭziali i prabili novyja vokny ŭ domie. A tak možna było?
Unikalnaja «apieracyja» była praviedziena ŭ mai ŭ adnym ź minskich hmachaŭ. U kvatery prabili dva dadatkovyja akny. Paŭnavartasnyja, pamieram bolš za dva mietry, piša Onliner.by. Voś jak heta było.
03.06.2024 / 12:47
«Kvadrataŭ» šmat, a voknaŭ mała
Viadoma, prakrucić takuju spravu niaprosta: treba vykanać usie ŭmovy i atrymać aficyjnyja dazvoły. Dy jašče i nie na kožny dom daduć dabro — pasprabuj zamachnucca na «stalinku» abo źmiani fasad doma, jaki hladzić na praśpiekt. Ale ŭ dadzienym vypadku ŭsie zorki syšlisia: novabudoŭla, nie hałoŭnaja vulica horada i apošni, 25-y, pavierch.
— Ščyra kažučy, z takim zapytam da nas źviarnulisia ŭpieršyniu, — pryznajecca inžynier-technołah kampanii «Vokny Panarama» Alaksandr Dapira. — Dy i ŭ pryncypie, nakolki ja viedaju, takich maštabnych pierarobak u Minsku jašče nie było. Adna sprava, kali pavialičvajuć abo dadajuć vokny ŭ pryvatnym domie, heta zvyčajnaja historyja. A voś u šmatkvaternym…
Pačałosia ŭsio z taho, što klijent kupiŭ na druhasnym rynku kvateru biez azdableńnia i paličyŭ, što voknaŭ u joj niedastatkova: vid vakoł pryhožy, a hladzieć niama z čaho. Jak možna vypravić? Tolki dadaŭšy akonnych prajomaŭ.
Bolšaści z nas navat u hałavu nie pryjšoŭ by taki fint — nu jak možna pajeści na fasad šmatpaviarchoŭki? Adnak ułaśnik nie tolki prydumaŭ płan pa «aśviatleńni» kvatery, ale i pajšoŭ pa instancyjach źbirać dazvoły. Biurakratyčny šlach vydaŭsia nie takim składanym, jak možna było vykazać zdahadku.
Asnoŭnaje i hałoŭnaje — trymać dazvoł ad vykankama svajho rajona.
Dla hetaha nieabchodna źviarnucca ŭ adździeł architektury i budaŭnictva z adpaviednaj zajavaj i schiemaj, na jakoj buduć paznačanyja novyja akonnyja prajomy. Adkazu pryjdziecca pačakać dzieści miesiac. Kali kamisija paličyć, što źjaŭleńnie novych voknaŭ nijak nie sapsuje ni dom, ni horad — adabreńnie budzie na rukach. Možna prystupać da pracy.
Jak heta było
— Da nas klijent pryjšoŭ, užo majučy dazvoł na rukach, — praciahvajuć dzialicca padrabiaznaściami ŭ kampanii. — Usio astatniaje — sprava techniki. Zadaču spraščała jašče i toje, što dom byŭ karkasna-manalitny, to jość vonkavyja ścieny nie apornyja, jany składajucca z zvyčajnaha hazasilikatu, jaki lohka paddajecca «transfarmacyi».
My padpisali damovu, uzhadnili pamiery voknaŭ, pradumali ŭsie techničnyja momanty (raspracavali vuzły i złučeńni). Na vytvorčaści zrabili sami vokny i pad ich pačali prabivać prajomy, — raspaviadaje Alaksandr.
Da hazasilikatnaha błoku šyrynioj 400 mm śpiecyjalisty padstupalisia dvojčy: spačatku vybili pałovu znutry, kab było mienš abłomkaŭ, jakija mohuć zvalicca ŭniz. I tolki zatym uzialisia za pracy zvonku, papiarednie abharadziŭšy stužkami terytoryju na ziamli, kab dakładna ničoha ni na kaho nie prylacieła.
— Dla taho kab atrymać dostup na dach, brali dazvoł u staršyni tavarystva ŭłaśnikaŭ. Uličvali i nadvorje: hladzieli, kab pa prahnozie nie było ni daždžoŭ, ni mocnaha vietru, inakš heta vielmi ŭskładniła b pracu.
Na toje, kab prasiekčy adzin prajom, u śpiecyjalista sychodziła prykładna paŭdnia. Usiaho my dadali dva akna — zvyčajnaje i vuhłavoje.
U cełym na abjekcie (z ulikam zamieny voknaŭ ad zabudoŭščyka na novyja) bryhada z troch čałaviek prabyła try dni. Susiedzi na šum, darečy, nie skardzilisia — usie pastavilisia z razumieńniem. Dy i my pracavali tolki ŭ dazvoleny čas. I kali chtości prasiŭ adkłaści pierfaratary na čas cichaj hadziny ŭ dziaciej, viadoma ž, zhadžalisia, — uspaminaje Alaksandr Dapira.
Kolki kaštuje «zapuścić śviatło « ŭ kvateru?
Prasiekčy i zašklić siaredniaje akno pamieram 2×2 mietry abyjdziecca prykładna ŭ 2000-2500 rubloŭ. Arhanizavany vyvaz śmiećcia ŭ hetuju sumu nie ŭvachodzić: usie abłomki prosta źbirajucca ŭ miaški i vynosiacca da miesca zboru budaŭničaha śmiećcia.
Na realizacyju prajekta — ad padpisańnia damovy da zdačy zakazčyku — u kampanii syšoŭ prykładna miesiac. Dalej znoŭ treba było ŭklučacca ŭłaśniku, bo pryhažość nieabchodna jašče lehalizavać, a mienavita: źviarnucca ŭ ahienctva pa dziaržrehistracyi i ziamielnym kadastry pa novy techpašpart na kvateru i paśviedčańnie ab rehistracyi. Śpiecyjalisty ahienctva pryznačać datu (chutčej za ŭsio, vizit adbudziecca na praciahu niekalkich bližejšych tydniaŭ) i pryjduć u kvateru, kab ubačyć na svaje vočy i adlustravać u dakumientach źmieny.
— Ramont u hetaj kvatery jašče praciahvajecca, tamu kančatkovaha varyjantu my nie bačyli. Ale navat pramiežkavy akazaŭsia vielmi efiektnym: śviatła i praŭda stała našmat bolš. Nu i vyhlad z vysokaha paviercha vydatny, — padsumoŭvajuć u kampanii.
U Minsku pradajecca 3-paviarchovaja kvatera ŭ taŭnchausie. Kolki chočuć za jaje?
U Minsku pradajecca kvatera z ułasnym kinateatram. Na jaje ŭžo prapanujuć źnižku 50 tysiač dalaraŭ
U elitnym domie ŭ Minsku radyjatarami aciapleńnia pierakryli francuzskija vokny «ŭ padłohu»