«Ściahi — nie vyćviłyja i nie patrapanyja». Minadukacyi padrychtavała «patryjatyčnyja» mietadyčki dla raboty z daškolnikami, školnikami i ich baćkami
Minadukacyi razasłała va ŭpraŭleńni pa adukacyi abłvykankamaŭ list, u jakim raspaviało pra toje, jak rekamienduje «pryščaplać u navučenskaj moładzi pavahu da dziaržsimvałaŭ».
04.06.2024 / 14:48
Ilustracyjnaje fota «Naša Niva»
Tekst lista abjadnańnie eks-siłavikoŭ «Biełpoł» pradastaviła «Miedyjazonie». Tak, siarod inšaha, pracavać Ministerstva adukacyi prapanuje nie tolki sa školnikami, ale i z daškolnikami, a jašče — ich baćkami.
Siarod rekamiendacyj Ministerstva adukacyi — praciahnuć raźmiaščać u škołach i inšych ustanovach adukacyi dziaržaŭnyja ściahi i hierby, ale «ŭ estetyčna aformlenych miescach, udalečyni ad pamiaškańniaŭ haspadarča-bytavoha i techničnaha pryznačeńnia».
Vykarystoŭvać treba tolki ściahi nie vyćviłyja i nie patrapanyja, a kali ściah pryjšoŭ u nieprydatnaść, jaho rekamiendujuć «niepublična źniščyć».
Taksama Ministerstva adukacyi rekamienduje pry pryjomie ŭ pijanierskuju arhanizacyju abo BRSM «pravodzić cyrymoniju ŭšanavańnia dziaržsimvałaŭ z pryniasieńniem klatvy na viernaść im».
Va ŭstanovy adukacyi, u tym liku i daškolnyja, rekamiendujecca kupić cacki i nastolnyja hulni, jakija b «farmavali ŭ dziaciej pavahu da dziaržaŭnych simvałaŭ z rańniaha ŭzrostu».
«Proma-pradukcyju» ź dziaržaŭnymi simvałami Minadukacyi prapanuje daryć vučniam za pośpiechi ŭ vučobie. Padarunki ministerstva taksama prapanuje rabić u pracoŭnych kalektyvach-maładym, u honar pryzyvu ŭ vojska, za dasiahnieńni «vysokich pracoŭnych pakazčykaŭ».