Izrail nanios udar pa schoviščy AAN u centry Hazy: 27 zahinułych
U čaćvier izrailskija vajskoŭcy nanieśli ŭdar pa budynku škoły ŭ Hazie, jakaja naležyć blizkaŭschodniamu ahienctvu AAN pa dapamozie paleścinskim uciekačam (BAPOR).
06.06.2024 / 15:44
Fota: Jehad Alshrafi / AP
Pradstaŭniki CACHAŁ zajavili, što tam znachodziŭsia kamandny punkt CHAMAS i ŭdaram źniščanyja bajeviki, datyčnyja da napadu 7 kastryčnika. Adnak paleścinskija ŚMI paviedamlajuć, što ŭ vyniku ŭdaru zahinuli nie mienš za 27 čałaviek, jakija šukali tam prytułak, piša Bi-bi-si.
Miascovyja žurnalisty raspaviali Bi-bi-si, što izrailski vajskovy samalot vypuściŭ dźvie rakiety pa pamiaškańniach na vierchnim paviersie škoły ŭ łahiery biežancaŭ «Nusiejrat». Kiraŭnik miedyja-słužby CHAMAS Ismaił Al-Tchavabta adchiliŭ zajavy Izraila ab tym, što ŭ hetaj škole ŭ centry Hazy byŭ schavany kamandny punkt hrupoŭki.
U zajavie Armii abarony Izraila havorycca, što źniščalniki nanieśli «dakładny ŭdar pa łahiery CHAMAS, raźmieščanym u škole ŭ rajonie «Nusiejrat», i byli źniščany «terarysty CHAMAS» i «isłamskaha džychadu», jakija ŭdzielničali ŭ napadzie na poŭdzień Izraila 7 kastryčnika minułaha hoda.
Izrailskija vajskoŭcy zajavili, što pierad udaram źniščalnikaŭ vajskoŭcy pryniali miery, kab źnizić ryzyku dla cyvilnaha nasielnictva.
Napiaredadni CACHAŁ abviaściŭ pra pačatak novaj vajennaj kampanii ŭ centry Hazy. Izrail zajaviŭ, što padčas pieramovaŭ ab spynieńni ahniu bajavyja dziejańni spynienyja nie buduć.