U składzie ekipažu źbitaha ŭ studzieni kala Biełharada Ił-76 byŭ biełarus. Što pra jaho viadoma
Ihar Sablinski staŭ čaćviortym zahinułym piłotam, jaki pachodziŭ ź Biełarusi i vajavaŭ na baku Rasii, piša Radyjo Svaboda.
07.06.2024 / 12:45
Transpartny samalot Ił-76 paciarpieŭ krušeńnie sioleta 24 studzienia ŭ Biełharadzkaj vobłaści. Tady rasiejskija ŭłady nazvali katastrofu Ił-76 teraktam i abvinavacili Ŭkrainu ŭ jaho źbićci.
Rasiejcy śćviardžali, što na hetym samalocie pieravozili 65 ukrainskich pałonnych dla zaplanavanaha na toj dzień abmienu. Tady praz padzieńnie samalota abmien skasavali, ale dahetul u Rasiei nie abnarodavali vyniki daśledavańnia znojdzienych na miescy padzieńnia čornych skryń i nie pieradali Ŭkrainie dokazy znachodžańnia na jaho borcie ŭkrainskich vajskoŭcaŭ.
Ciapier i ŭ Rasiei, i va Ŭkrainie pa fakcie katastrofy Ił-76 viaduć kryminalnaje raśśledavańnie.
Uvieś ekipaž zahinuŭ
Ekipaž samalota składaŭsia z 6 asobaŭ. U jaho skład uvachodziŭ bartavy radyst Ihar Sablinski. Jon pachodzić ź Biełarusi — naradziŭsia ŭ Viciebsku.
Jašče try čalcy ekipažu: šturman Alaksiej Vysokin, kamandzir Stanisłaŭ Biazzubkin i bortinžyner Andrej Piłujeŭ
Členaŭ ekipažu doŭha nie mahli identyfikavać. Aficyjnaja cyrymonija raźvitańnia z ekipažam adbyłasia tolki 8 lutaha.
Vydańnie «Južnyj Urał» sa spasyłkaj na pradstaŭnika kamandnaha składu 117-ha vajskova-transpartnaha avijapałku Arenburhu paviedamiła, što cieły ekipažu «źbirali pa frahmentach».
«Pakul cieły pa poli rassypanyja, idzie zbor frahmentaŭ», — cytavała vydańnie pradstaŭnika połku praź piać dzion paśla katastrofy.
Jon ža raskazaŭ, što hety ekipaž byŭ «źlatany» — vykonvaŭ zadačy i ŭ Syryi, i ŭ Kazachstanie, i na tušeńni pažaraŭ u Tureččynie.
Dla staršaha praparščyka Ihara Sablinskaha heta musiŭ być ci nie apošni palot — paśla 30 hadoŭ słužby jon padaŭ dakumenty ab vychadzie na pensiju pa ŭzroście.
Naradziŭsia ŭ Viciebsku ŭ siamji lotčyka
Ihar Sablinski naradziŭsia ŭ Viciebsku 6 vieraśnia 1969 hodu. U Biełarusi jaho i pachavali, adnak dakładnaje miesca pachavańnia publična nie ŭdakładniali.
Hramadzianskaja žonka radysta Julija Šukšyna, ź jakoj jany rychtavalisia da viasiella, paviedamiła, što baćki Ihara Sablinskaha pamierli, kali jamu było 20 hadoŭ.
Pavodle jaje słoŭ, Ihar pajšoŭ vučycca na pilota adrazu paśla škoły.
«Jon sprabavaŭ siabie ŭ inšych sferach, ale zaŭsiody kazaŭ, što latać — adzinaje, što sapraŭdy padabajecca i čym jon choča zajmacca. Pajšoŭ šlacham baćki, jaki taksama byŭ lotčykam», — raskazała jana miascovym žurnalistam.
U siamji Sablinskich było čaćviora dziaciej — Ihar, jahonaja siastra-bliźnia i małodšyja siastra i brat.
U pieršym šlubie Ihar Sablinski mieŭ dačku Arynu.
Dačka pryjšła na raźvitańnie z baćkam u jahonym kicieli
Aryna Sablinskaja, dačka zahinułaha radysta ad pieršaha šlubu, žyvie ŭ Arenburhu. Jana vučyłasia ŭ miascovym universytecie na jurydyčnym fakultecie.
Na cyrymoniju raźvitańnia, jakaja prachodziła ŭ spartova-kulturnym kompleksie «Arenburža» 8 lutaha, pavodle miascovych vydańniaŭ, pryjšli «tysiačy žycharoŭ Arenburhu».
Usie truny byli zakrytyja, a na ich lažali rasiejskija ściahi. Na hetuju cyrymoniju prybyŭ kamandujučy vajskova-transpartnaj avijacyjaj Rasiei Ŭładzimir Bieniedyktaŭ, jaki ŭručyŭ dziaržaŭnyja ŭznaharody svajakam zahinułych lotčykaŭ. Rasiejski prezydent Uładzimir Pucin padpisaŭ ukaz ab ich paśmiarotnym uznaharodžańni ordenami Mužnaści za toje, što adviali padbity samalot ad nasielenaha punktu.
Orden Mužnaści Sablinskaha atrymała jahonaja dačka.
Jakija jašče ŭznaharody mieŭ pry žyćci
Ihar Sablinski mieŭ kvalifikacyjnuju katehoryju «bartavy specyjalist pieršaj klasy», staršy pavietrany radyst. Jon pracavaŭ i instruktaram maładych lotčykaŭ. U niebie pravioŭ bolš za 6 tysiač hadzin.
Jak paviedamiła «Novoorskaja hazieta», «za mužnaść, advahu i samaachviarnaść» jon byŭ uznaharodžany medalom Nieścierava (dziaržaŭnaja rasiejskaja ŭznaharoda, nazvanaja ŭ honar vajskovaha lotčyka Piatra Nieścierava, jaki ŭpieršyniu ŭ praktycy bajavoj avijacyi vykarystaŭ taran, zahinuŭ u 1914 hodzie. — RS), medalami «Za adznaku ŭ vajskovaj słužbie» ŭsich stupieniaŭ, «Za vajskovuju dobleść» 2 i 1 stupieni, «Udzielnik vajennaj aperacyi ŭ Syryi» i «Za ŭmacavańnie bajavoj sadružnaści».
Z pačatku vajny ŭklučyli ŭ bazu «Miratvorac»
Ihar Sablinski razam ź inšymi svaimi kalehami pa ekipažy paśla pačatku poŭnamaštabnaj vajny Rasiei suprać Ukrainy trapiŭ u bazu «Miratvorac» jak «udzielnik rasiejska-biełaruskaj vajennaj ahresii» i «saŭdzielnik złačynstvaŭ rasiejskaj ułady suprać Ukrainy i jaje hramadzian».
Hałoŭnaje ŭpraŭleńnie vyviedki Ministerstva abarony Ŭkrainy 10 sakavika 2022 hodu identyfikavała Ihara Sablinskaha jak vajskoŭca 117-ha asobnaha transpartnaha avijapałka, jaki dastaŭlaŭ zbroju i bojeprypasy dla zabojstva mirnych hramadzian Ukrainy.
Kolki jašče pilotaŭ biełaruskaha pachodžańnia vajavali na baku Rasiei i zahinuli
Ihar Sablinski staŭ čaćviortym zahinułym lotčykam, jaki pachodziŭ ź Biełarusi vajavaŭ na baku Rasiei. Ale jon adziny, kaho pachavali ŭ Biełarusi.
Viadoma, što adnym ź pieršych zahinuŭ Raman Hrovič. Jon pachodziŭ z Kobryni Bieraściejskaj vobłaści, naradziŭsia 16 lutaha 1974 hodu i zahinuŭ u pieršy ž dzień vajny, 24 lutaha 2022-ha, pad Kijevam. Raman Hrovič byŭ kamandziram viertalotnaha źviana, mieŭ zvańnie majora. Jahony viertalot ukraincy źbili nad Kijeŭskim vadaschoviščam. Źviestak ab tym, dzie jon pachavany, niama. U 1995 hodzie jon skončyŭ Syzranskaje vyšejšaje avijacyjnaje vučylišča.
12 traŭnia 2022 hodu va ŭzroście 67 hadoŭ zahinuŭ były biełaruski lotčyk Mikałaj Markaŭ. Jon choć i naradziŭsia ŭ Rasiei, ale pachavany ŭ horadzie Lidzie Horadzienskaj vobłaści (peŭna, mieŭ biełaruskaje hramadzianstva). Mikałaj Markaŭ vučyŭsia va Ŭkrainie — u 1976 hodzie jon skončyŭ Čarnihaŭskaje vyšejšaje vajskova-avijacyjnaje vučylišča. Słužyŭ spačatku ŭ Kazachstanie, a potym u Biełarusi — u Pastavach i Lidzie. Vyjšaŭ u adstaŭku ŭ zvańni pałkoŭnika avijacyi Respubliki Biełaruś. Mahčyma, vajavaŭ u składzie PVK «Vahner» u Afrycy, a potym adpraviŭsia na Danbas. Ukraincy źbili jahony samalot-šturmavik Su-25 nad Papasnaj u Łuhanskaj vobłaści.
Kapitan Ihar Vałačyłaŭ, bartavy mechanik rasiejskaha vajskovaha samalota Ił-22, jaki źbili vahneraŭcy ŭ časie svajho miaciažu, pachodziŭ ź Biełarusi. Jon naradziŭsia ŭ pasiołku Bałbasava Aršanskaha rajonu Viciebskaj vobłaści ŭ śniežni 1973 hodu. U 1996 hodzie skončyŭ Staŭrapolskaje vyšejšaje avijacyjnaje inžynernaje vučylišča. Z 2015 hodu słužyŭ u vajskovym centry na aeradromie ŭ Ivanaŭskaj vobłaści Rasiei. Viadoma, što da svajoj hibieli ŭ časie miaciažu vahneraŭcaŭ Ihar Vałačyłaŭ vykonvaŭ «bajavyja zadačy» na vajnie Rasiei va Ŭkrainie. Jaho pachavali na haradzkich mohiłkach u rasiejskim horadzie Ivanavie.