Pamierła Natalla Afanaśjeva. Jana prajektavała Minski płanietaryj i staličnyja žyłyja kvartały
Biełaruskaj architektarki i ŭdavy Leanida Levina nie stała 30 maja na 88-m hodzie žyćcia.
07.06.2024 / 17:58
Natalla Afanaśjeva za pracaj. Fota: BSA
Pra heta paviedamiŭ Biełaruski sajuz architektaraŭ.
Natalla Afanaśjeva naradziłasia 22 luty 1937 hoda ŭ rasijskim horadzie Novakuźniecku, što ŭ Kiemieraŭskaj vobłaści.
U 1960 hodzie skončyła Biełaruski politechničny instytut. Paśla pracavała ŭ majsterni hienpłana instytuta «Minskprajekt», a z utvareńniem instytuta «Minskhrada» ŭ 1992 hodzie pierajšła ŭ jaho razam z usioj majsterniaj.
Z 1966 hoda była členam Sajuza architektaraŭ SSSR.
Absiervatoryja ŭ minskim parku imia Maksima Horkaha. Fota: Huhł Karty
Da jaje asnoŭnych prac naležać prajekt Minskaha płanietaryja i absiervatoryi ŭ parku imia M. Horkaha (1964), prajekty płaniroŭki i zabudovy staličnych žyłych rajonaŭ Rakaŭskaja šaša (1968), pa vulicach Aeradromnaj (1968), M. Horkaha (1970), Paŭdniovaha Zachadu (1976). Taksama prymała ŭdzieł u stvareńni hienieralnych płanaŭ horada Minska 1965, 1980 hadoŭ i ŭsich ich nastupnych karektur.
Za karekturu hienpłana Minska da 2000 hoda, jakaja była raspracavana ŭ 1982 hodzie, aŭtarski kalektyŭ atrymaŭ premiju Savieta Ministraŭ SSSR.
Natalla Afanaśjeva z mužam Leanidam Levinym i dačkoj Halinaj. Fota: «Źviazda»
Sa svaim budučym mužam, Zasłužanym architektaram Biełarusi i staršynioj Sajuza biełaruskich jaŭrejskich hramadskich abjadnańniaŭ i abščyn Leanidam Levinym, Natalla paznajomiłasia ŭ čas vučoby. U ich naradziłasia dačka Halina, jakaja pajšła pa śladach baćkoŭ, staŭšy taksama viadomaj architektarkaj i dziajačkaj jaŭrejskaj hramady ŭ Biełarusi.