Праўладны канал: Калі дзяржаўныя выданні не могуць вычысціць забароненыя спасылкі, то як патрабаваць гэтага ад звычайных рабацяг
«Непарадак».
08.06.2024 / 16:46
За старыя рэпосты навін заблакаваных рэсурсаў людзей кідаюць на суткі, але такіх спасылак процьма на сайтах дзяржаўных медыя і органаў. Ілюстрацыйнае фота: «Наша Ніва»
Праўладны тэлеграм-канал «Графач» звярнуў увагу на стары артыкул у «СБ. Беларусь сегодня», дзе засталася спасылка на Tut.by і фота з лагатыпам партала, які ўлады прызналі экстрэмісцкім.
Так выглядаў артыкул на сайце «СБ. Беларусь сегодня»
«Калі ўжо дзяржаўныя выданні з цэлымі рэдакцыямі не могуць у сябе вычысціць усе спасылкі і згадкі цяпер забароненых СМІ, то як можна патрабаваць гэтага ад звычайных рабацяг або бабуль у «Аднакласніках».
А то любяць у нас прад'яўляць прэтэнзіі за старыя рэпосты, лайкі і падпіскі. Непарадак», — напісаў «Графач».
Аўтар канала пажартаваў, што калі б ён быў турбапатрыётам, то ўжо крычаў бы, што «бэчэбэшнікі і прыхільнікі дзяржперавароту пралезлі ў святая святых», і патрабаваў правесці чысткі.
«СБ» у тым артыкуле неўзабаве выдаліла спасылкі на Tut.by.