Пранкеры развялі міністра замежных спраў Вялікабрытаніі
Ён пагаварыў з невядомым, які выдаў сябе за Пятра Парашэнку.
08.06.2024 / 17:17
Дэвід Кэмеран. Фота: AP Photo/Markus Schreiber
Міністр замежных спраў Вялікабрытаніі Дэвід Кэмеран стаў ахвярай пранкераў, паведаміла само МЗС.
Размова з чалавекам, які прадставіўся Парашэнкам, адбылася па відэасувязі «у апошнія дні». Працягвалася яна нядоўга, а пра сам званок пранкеры дамаўляліся праз тэкставыя паведамленні.
На відэа быў чалавек, падобны да Парашэнкі, аднак неўзабаве Кэмеран западозрыў, што ён мае справу з ашуканцамі. Міністр перастаў адказваць, калі той, хто тэлефанаваў, папрасіў яго даць кантактныя звесткі іншых людзей.
МЗС не ўдакладняе, пра што яшчэ была размова.
«Міністр замежных спраў шкадуе аб сваёй памылцы, але лічыць, што аб падобных паводзінах неабходна казаць голасна і што мы павінны ўзмацніць барацьбу з дэзінфармацыяй», — сказана ў заяве МЗС.
Расійскія тэлефонныя пранкеры Аляксей Сталяроў і Уладзімір Кузняцоў, вядомыя як Лексус і Вован, не раз разводзілі чыноўнікаў, выдаючы сябе за розных палітыкаў. З брытанцаў яны тэлефанавалі Барысу Джонсану, Бэн Уоллес
Ці цяперашні званок — справа іх рук, не паведамляецца.
Пад выглядам Парашэнкі гэтыя пранкеры ў 2023 годзе званілі таксама Святлане Ціханоўскай. А ў 2014-м разыгралі Аляксандра Лукашэнку. Яму пазванілі пад выглядам сына былога прэзідэнта Украіны Віктара Януковіча і пыталіся пра магчымасць палітычнага прытулку.