У школах увядуць факультатыў па медыцыне
Заняткі прапануюць навучэнцам X-XI класаў.
11.06.2024 / 09:08
Фота: Мінздароўя
Мінадукацыі зацвердзіла праграму яшчэ аднаго школьнага факультатыва: «Уводзіны ў медыцынскую прафесію». Пастанова апублікаваная на Нацыянальным прававым партале, піша Tochka.by.
У навучальную праграму ўключылі не толькі тэорыю, але і практыку, і нават экскурсіі ў медустановы. Дактарамі пасля факультатыва, вядома ж, школьнікі не стануць, а вось уяўленне пра медыцынскія прафесіі і базавыя навыкі атрымаюць.
У Х класе на занятках вывучаць гісторыю медыцыны, сістэму медадукацыі ў Беларусі, абмяркуюць вобраз медыцынскага работніка. Астатнія гадзіны прысвецяць здароваму ладу жыцця, асновам гігіены і меддапамогі насельніцтву.
А вось у XI класе пяройдуць да больш складаных рэчаў — анатоміі, фізіялогіі і нават фармакалогіі. Дзецям раскажуць аб метадах дыягностыкі і медыцынскай рэабілітацыі.
Скрыжаванне з «медыцынскай падрыхтоўкай»
У X-XI класах ёсць такі прадмет, як Дапрызыўная і медыцынская падрыхтоўка». Блок па медыцыне праходзяць дзяўчынкі.
Некаторыя тэмы заняткаў перасякаюцца з праграмай факультатыва. Напрыклад, і там і там праходзяць лекавыя прэпараты, першую медыцынскую дапамогу, накладанне павязак.
Але розніца ўсё ж такі ёсць: на ўроках «медыцынскай падрыхтоўкі» ўпор робяць на адпрацоўку навыкаў. Напрыклад, шмат вучэбных гадзін адведзена на тое, каб школьнікі навучыліся рабіць павязкі.
У той жа час на факультатыве ўпор робіцца на азнаямленне з прафесіяй, таму ў праграму ўключаны і экскурсіі ў медустановы, аптэкі і інш.
У школах з'явіцца сем новых факультатываў
«Патрэбен асобны раздзел». У новым школьным падручніку гісторыі раскажуць пра падзеі 2020 года
На беларускім школьным факультатыве збіраюцца вывучаць творчасць «Бі-2»