Некалькі забітых пры штурме захопнікаў былі ў кайданках. Што не так у афіцыйнай версіі з закладнікамі ў растоўскім СІЗА
Усе зняволеныя, якія захапілі закладнікаў у растоўскім СІЗА-1, былі забітыя пры штурме, сцвярджае ФСВП. Пры гэтым на целах дваіх на апублікаваным відэа бачныя кайданкі. Аб нестыкоўках «МО» распавяла заснавальнік фонду «Русь сидящая» Вольга Раманава.
16.06.2024 / 14:53
Забітыя захопнікі ў растоўскім СІЗА. Скрын відэа
Паводле слоў Раманавай, захоп закладнікаў адбыўся яшчэ ўначы. «Яны нейкім чынам адначасова вызваліліся з некалькіх камер. Сукамернікі не сталі падымаць трывогу. У іх была сувязь, былі мабільнікі», — кажа Раманава.
У ноч на нядзелю ў СІЗА чамусьці знаходзіўся высокапастаўлены начальнік — падпалкоўнік, кіраўнік аператыўнага ўпраўлення абласнога ФСВП Аляксандр Богма. Ён стаў адным з закладнікаў. «Богма там нават не працуе, што ён рабіў у СІЗА ноччу ў выходныя?» — не разумее Раманава. «Незразумела, што ён рабіў у СІЗА ў нядзелю. Нагадаю, што ў выходныя зняволеных у суды і на следчыя дзеянні не вывозяць, да адваката і на спатканні таксама», — дадала праваабаронца Ева Меркачова ў тэлеграм-канале.
У СІЗА-1, падкрэслівае Раманава, утрымліваюцца ўкраінскія ваеннапалонныя. «Некаторых з іх таксама абвінавачваюць па тэрарыстычных артыкулах. Не здзіўлюся, калі да вечара ў бунце ідзілаўцаў знойдуць «украінскі след», як гэта было пасля тэракту ў «Крокусе». Не здзіўлюся, калі некаторых тых, хто выжыў пры штурме дабілі», — каментуе Раманава.
ТАСС са спасылкай на органы паведаміў, што захоп закладнікаў рыхтаваўся не адзін месяц і мог каардынавацца звонку.
За тыдзень да захопу абласное ФСВП апублікавала рэпартаж аб ахове СІЗА-1, назваўшы яе найлепшай у вобласці.
Цяпер супрацоўнікі СІЗА самі трапяць пад следства. Па інфармацыі Mash, супрацоўнікі вонкавага персаналу растоўскага СІЗА маглі дапамагчы тэрарыстам у арганізацыі ўцёкаў. Такую версію, паводле Mash, цяпер разглядаюць праваахоўнікі. Сярод патэнцыйных памагатых у тым ліку работнікі сталовай, загадчык гаспадаркі, прыбіральшчыкі і гэтак далей.
Крыніцы ў ФСВП таксама распавялі, што ізалятар у Растове перапоўнены. Пры ліміце ў 500 чалавек там сядзіць амаль 900 зняволеных.
Супрацоўнікі растоўскага СІЗА-1, якіх утрымлівалі ў закладніках, вызваленыя. Зняволеныя — забітыя
«Людзі настроеныя сур'ёзна. Пачуйце іх». У Растове затрыманыя ўзялі ў закладнікі супрацоўнікаў СІЗА