Jakuju majomaść maje top-mieniedžar Biełčyhunki Piotr Dułub, u tajnikach jakoha znajšli $3 miljony
Były namieśnik kiraŭnika Biełčyhunki ciapier pad vartaj. «Jon vioŭ askietyčny ład žyćcia na ŭzroŭni nižej za siaredni», — kazali pa dziaržTB.
19.06.2024 / 15:22
Piotr Dułub. Fota: rw.by
Chabary Dułub braŭ ciaham niekalkich hadoŭ, paviedamiła MUS. U schovankach kvatery i zaharadnaha doma top-mieniedžara čyhunki znajšli bolš za 3 miljony dalaraŭ. Dziaržaŭnyja miedyja padkreślivajuć, što jon braŭ rekordnyja dla našaj krainy chabary, ale žyŭ ścipła.
«Chabary braŭ hadami i ich naohuł nie traciŭ. Jość zaharadny dom, ale ŭ asnoŭnym žyŭ u prościeńkaj kvatery, dzie vyvalvajucca razietki, jeździŭ na niedarahoj patrymanaj mašynie i vioŭ askietyčny ład žyćcia na ŭzroŭni nižej za siaredni», — kazali ŭ siužecie ANT.
Jakoj ža majomaściu vałodaje Dułub?
Zhodna z bazami «Biełpoł» (infarmacyja ŭ ich pryviedziena na 2021 hod), u jaho ŭłasnaści jość amal 100-mietrovaja trochpakajoŭka ŭ Minsku, na vulicy Varanianskaha, pobač sa stancyjaj mietro «Kavalskaja słabada». Kvateru Dułub kupiŭ u 2018-m. Trochpakajoŭki ŭ hetym ža domie ciapier pradajuć pa 600 tysiač rubloŭ, kvatery takoha ž mietražu pobač — kala 450 tysiač.
Dom na vulicy Varanianskaha, dzie maje kvateru Dułub. Fota: «Jandeks Panarama»
Jość kvatera i ŭ žonki Dułuba, taksama trochpakajovaja, płoščaj 95 mietraŭ. Znachodzicca jana taksama pa vulicy Varanianskaha, za joj zamacavanaje mašynamiesca. Žonka vałodaje kvateraj z 2008-ha, dom tady byŭ zusim śviežy. Rynkavy košt kvatery prykładna taki ž samy.
U zvodkach MUS zhadvałasia, što ŭ siamji Dułubaŭ taksama jość zaharadny dom.
Piatru Dułubu 46 hadoŭ. U 1999-m jon skončyŭ homielski Biełaruski dziaržaŭny ŭniviersitet transpartu pa śpiecyjalnaści «Arhanizacyja ruchu i kiravańnie na transparcie». Pa raźmierkavańni pajšoŭ pracavać dziažurnym na stancyi Minsk-Sartyravalny. Z 2002-ha pracavaŭ va ŭpraŭleńni Biełaruskaj čyhunki, dzie dasłužyŭsia da kiraŭnika słužby pieravozak.
U 2019-m Dułuba ŭznaharodzili znakam «Hanarovy čyhunačnik». A ŭ sakaviku 2021-ha jaho pryznačyli pieršym namieśnikam načalnika Biełaruskaj čyhunki.
Dułub žanaty, maje dvach synoŭ, adzin ź jakich jašče niepaŭnahadovy.
Pra zatrymańnie mužčyny pieršaj paviedamiła «Supolnaść čyhunačnikaŭ Biełarusi». Tady kazałasia, što jon zatrymany 18 maja, suma chabaru nazyvałasia ŭ miljon dalaraŭ, ale pa vyniku akazałasia ŭtraja bolšaj.
U pieršaha namieśnika kiraŭnika Biełčyhunki znajšli doma $3 miljony
Pieršaha namieśnika kiraŭnika Biełčyhunki aryštavali z $1 miljonam chabaru
Padobna, dvuch top-čynoŭnikaŭ ź Minfina i Mintransa sudziać za chabar i «zdradu dziaržavie»