U Hrodnie za kamientary i ŭdzieł u pratestach zatrymali pravasłaŭnaha charysta Daniela Kiejta. Voś jak jaho adšukali
Padobna, pryčyna znoŭ u telehram-akaŭncie.
20.06.2024 / 19:27
Daniel-Łandsej Kiejta śpiavaje ŭ pravasłaŭnym chory «Usichśviacki», krasavik 2024. Fota: ndsmi.by
Danielu-Łandseju Kiejta 24 hady, jon minčuk. U 2018-m skončyŭ Respublikanski muzyčny kaledž na dyryžora. Paśla pastupiŭ u Biełaruskuju dziaržaŭnuju akademiju muzyki pa toj ža śpiecyjalnaści. Byŭ łaŭreatam konkursa maładych vakalistaŭ imia Šalapina.
Viadoma, što chłopiec pravasłaŭny viernik. Da 2019-ha śpiavaŭ u chramie imia Alaksandra Nieŭskaha ŭ Minsku, jaki znachodzicca na vulicy Kazłova, paśla pačaŭ śpiavać u chory «Usichśviacki», jaki bazujecca ŭ Chramie ŭsich śviatych na adnajmiennaj vulicy ŭ Minsku.
Jahony tembr — baryton.
Daniel-Łandsej Kiejta. Fota ź jahonaj staronki «Ukantakcie» (archiŭnaja kopija)
Ciapier chłopca zatrymali. Jaho vinavaciać u kamientarach, jakija jon pakinuŭ u čatach. U asnoŭnym jon sprabavaŭ spračacca z prychilnikami Łukašenki ŭ roznych «jabaćkačatach», pryčym rabiŭ heta davoli prystojna. Pakidaŭ jon i kamientary ŭ padtrymku Ukrainy, na jakija siłaviki źviartajuć asablivuju ŭvahu, i kamientary z asudžeńniem hvałtu siłavikoŭ.
Akaŭnt Daniela ŭ telehramie byŭ pryviazany da jaho asabistaha numara, było ŭ im i fota chłopca. A fota z pratestaŭ, jakija demanstrujuć siłaviki, zachoŭvałasia ŭ jahonym telefonie — najchutčej ich adšukali ŭžo paśla zatrymańnia.
Viadoma, što jaho zatrymlivali ŭ 2020-m pa palityčnym administracyjnym artykule, ale za što, nie paviedamlajecca.
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć
Ja vydaliŭ Telegram-akaŭnt. Ja ŭ biaśpiecy?