У Пецярбургу затрыманыя былыя менеджары медыяімперыі Яўгена Прыгожына
Затрыманні адбыліся ў гадавіну так званага Маршу справядлівасці Яўгена Прыгожына на Маскву, які пачаўся 23 чэрвеня 2023 года.
23.06.2024 / 08:29
Вагнераўцы ў Растове-на-Доне падчас бунту Прыгожына 24 чэрвеня 2023 года. Фота: Arkady Budnitsky / Anadolu Agency via Getty Images
У Пецярбургу затрымалі былога топ-менеджара медыяхолдынга «Патрыёт» Іллю Гарбунова і галоўнага рэдактара «Канкрэтна.ру» Кірыла Мяцелева. Ім ставяць у віну вымагальніцтва сродкаў таксама ў прыгожынца, сябра Грамадскай палаты Аляксандра Малькевіча, піша «Фантанка».
Ілля Гарбуноў да 2014 года працаваў карэспандэнтам у рэдакцыі РІА «Навіны» ва Уладзівастоку, пасля перайшоў у «Камсамольскую праўду» ў Пецярбургу.
Прыкладна з 2016 года Гарбуноў пачаў супрацоўніцтва са структурамі Прыгожына, збіраючы кампрамат на апазіцыянераў, і ўжо да 2019 года ўзначаліў медыягрупу «Патрыёт», а з 2020 — і фабрыку троляў.
Мяцелеў, як піша «Фантанка», у 1996 годзе стаў сузаснавальнікам часопіса прыватных ахоўных прадпрыемстваў «Аператыўнае прыкрыццё». Таксама ён паказаны галоўным рэдактарам сайта «Канкрэтна.ру».
Звяртае ўвагу, што затрыманні адбыліся якраз да гадавіны так званага Маршу справядлівасці Яўгена Прыгожына на Маскву, які пачаўся 23 чэрвеня 2023 года.
У Пецярбургу паставілі помнік Прыгожыну ФОТАФАКТ
ПВК «Вагнер» вярбуе жыхароў Беларусі для адпраўкі ў Афрыку
Адзін з двайнікоў Прыгожына загінуў ва Украіне