Vučonyja papiaredžvajuć: kali my śpim pry śviatle, značna pavyšajecca ryzyka dyjabietu
Heta adbyvajecca niezaležna ad našaj aktyŭnaści dniom.
28.06.2024 / 20:34
Jak piša Newatlas, vučonyja z Univiersiteta Flindersa (Aŭstralija) praviali maštabnaje daśledavańnie, dla jakoha jany vykarystali danyja bijabanka Vialikabrytanii.
Amal 85 tysiač čałaviek na praciahu tydnia nasili na zapiaści datčyk śviatła ŭ pieryjad z 2013 pa 2016 hady. Praź dzieviać hadoŭ bolš za 13 miljonaŭ hadzin danych datčykaŭ śviatła byli praanalizavanyja i supastaŭlenyja z danymi pra stan zdaroŭja.
Analiz pakazaŭ, što ŭździejańnie śviatła z 00.30 da 6.00 ujaŭlaje saboj surjoznuju prablemu dla zdaroŭja. Heta moža być śviatło ad štučnych krynic, takich jak lampy, ekrany televizaraŭ ci manitory kampjutaraŭ, vuličnych lichtaroŭ, padśvietki budynkaŭ.
Było vyjaŭlena, što ryzyka raźvićcia dyjabietu 2-j stupieni raście z kolkaściu času, praviedzienaha pad uździejańniem načnoha aśviatleńnia. Maksimalny rost skłaŭ 67%. Na pakazčyki nie ŭpłyvali pavodziny ludziej dniom. Navat paśla ŭliku inšych faktaraŭ, takich jak ład žyćcia, nierehularnaść snu, dyjeta i psichičnaje zdaroŭje, uździejańnie śviatła nočču zastajecca mocnym predyktaram raźvićcia dyjabietu.
Vučonyja adznačajuć, što ich daśledavańnie paćvierdziła hipotezu ab tym, što ŭździejańnie aśviatleńnia nočču moža parušyć cyrkadnyja rytmy. U vyniku adbyvajucca źmieny ŭ sakrecyi insulinu i mietabalizmu hlukozy. Heta, u svaju čarhu, upłyvaje na zdolnaść arhanizmu rehulavać uzrovień cukru ŭ kryvi, što moža pryvieści da raźvićcia dyjabietu 2-j stupieni.
Takim čynam, pišuć aŭtary, atrymanyja vyniki pakazvajuć, što źmianšeńnie ŭździejańnia śviatła ŭ načny čas i padtrymańnie režymu ciemry moža być prostym i tannym sposabam praduchilić ci zatrymać raźvićcio dyjabietu 2-j stupieni.
Koler vačej upłyvaje na vašu zdolnaść čytać — vučonyja. Jak tak?
Vučonyja stvaryli dla ludziej rabatyzavany šosty palec