«Sa śloz rusałak». U Biełarusi pradajuć lod pa canie miasa
Žycharka Minska apublikavała ŭ tyktoku rolik, źniaty ŭ kramie ProStore, u jakoj pradajecca lod amal za 10 rubloŭ za kiłahram. Jana zaŭvažyła jaho ŭ marazilniku siarod marožanaha.
29.06.2024 / 16:52
Skrynšot ź videa
Na roliku vidać, što 9 kavałačkaŭ zamarožanaj vady ahulnaj vahoj 1,45 kiłahrama pradajuć u stalicy amal za 14 rubloŭ (cana za kiło — 9,58 rubloŭ). U składzie paznačany adziny «inhredyjent» — vada pitnaja ačyščanaja zamarožanaja, a termin prydatnaści — 540 sutak, pry ŭmovach zachoŭvańnia ŭ -18°C.
«Pa canie miasa!» — uražanaja aŭtarka videa Kryścina, pakazvajučy ceńnik na šašłyk pa prykładna supastaŭnaj canie.
Kamientatary pad rolikam zbolšaha taksama ździŭlenyja takim ceńnikam na lod u kramie:
«Albo hłabalnaje paciapleńnie ŭžo na nosie, albo chutka pačniem rabić šašłyki z kubikaŭ lodu».
«U mianie ŭ maraziłcy lod nie pa canie miasa, a ź jaho pacham. I jašče notki kropu jość».
«Što vy razumiejecie. Heta file vady va ŭłasnym soku».
«Jon zrobleny sa śloz rusałak».
«Heta vy jašče canu na pakiecik z pavietram nie bačyli!»
Inšyja, adnak, schilnyja stavicca da takoha cenaŭtvareńnia kali nie ŭchvalna, to z razumieńniem:
«Chutčej za ŭsio, majecca na ŭvazie chutkaść zamarozki, i čym jana vyšejšaja, tym mienš burbałak pavietra ŭ lodzie. Nu i jakaść ačystki vady, viadoma», — piša adzin z padpisantaŭ.
Inšy jaho padtrymlivaje: «Luby zamarožany da —20°C lod — adnolkava hłybokaj zamarazki. Hety adroźnivajecca tym, što prazrysty. Heta kruta, doma taki zrabić składana, ale ceńnik zavyšany».
«Heta kapiec, kamienty hetamu lodu stolki cudadziejnych ułaścivaściaŭ naprydumlali, što ja ŭžo zadumvajusia, ci nie zanadta tanna jaho pradajuć», — pairanizavała z hetaj nahody adna z žančyn.
Hety lod vyrablaje ŭ Biełarusi kampanija «Vitałajs». Jaho časta kuplajuć roznyja bary i restarany. U adnoj z dastavak jość lod hetaj kampanii ŭ inšaj ŭpakoŭcy pa 4,49 rubloŭ za 600 hram. A kali zakazvać ad 24 kiłahram u vytvorcy lodu, to, zhodna ź infarmacyjaj na ich sajcie, možna kupić pa 3 rubli za kiłahram.
«Nie bačyła navat stolki». Dziaŭčyna publična pradehustavała ažno 15 vidaŭ rahačoŭskaj zhuščonki
Jeŭropu pačała zavajoŭvać novaja harodnina — cukijoła. Što heta takoje i kali čakać u Biełarusi?