Na rok-fiestyvali ŭ Pružanach hurt «Kino» ŭ apošni momant pamianiali na dvuch Z-vykanaŭcaŭ
Učora ŭ Pružanach startavaŭ rok-fiestyval «Soncastajańnie». Vydańnie BGmedia zaŭvažyła, što ŭ apošni momant u im adbylisia źmieny ŭ prahramie, jakija, u pryncypie, ŭ ciapierašnich umovach nie ździŭlajuć.
29.06.2024 / 19:35
Rekłama fiestyvala «Soncastajańnie» ŭ Pružanach. Fota: budni.by
Prynamsi try rajonnyja vydańni napisali napiaredadni rok-fiestyvala, što prahrama źviedała źmieny ŭ płanie składu artystaŭ. Miascovyja prapahandysty spasłalisia na arhanizataraŭ, jakija zajavili, što da śpisu chedłajnieraŭ «dałučycca stvaralnik hrupy «Karol i Šut» Andrej Kniazieŭ i hurt «KniaZz», a taksama hurt «Kipiełaŭ».
«U suviazi z fors-mažornymi abstavinami, niezaležnymi ad arhanizataraŭ, hurt «Kino» nie voźmie ŭdzieł u rok-fiestyvali. Vakantnaje miesca na rok-fiestyvali zojmie hurt, pieśni jakoha vy viedajecie na pamiać!», — napisali arhanizatary fiestyvala ŭ instahramie, majučy na ŭvazie hurt «Kipiełaŭ».
Nivodnaja z rajonak u svaich paviedamleńniach, darečy, nie zhadała, što z afišy fiestyvalu źnik hurt «Kino».
Na staroncy rok-fiestyvala «Soncastajańnie» ŭ instahramie karystalniki ŭ kamientarach pisali, što hurt «Kino» nibyta «nie zachacieŭ pryjazdžać, tamu što im zabaranili śpiavać pieśniu «Pieramien», a heta ich kultavaja pieśnia».
Sučasny skład hrupy «Kino». Fota: rocketsmusic.ru
Jašče adzin z kamientataraŭ vykazaŭ zdahadku, što hurt «chutčej za ŭsio i nie pavinien byŭ pryjechać, heta było chutčej za ŭsio dla raskrutki». Ale možna mierkavać, što hurt «Kino» nie pajechaŭ na kancert u Pružany, dzie ilvinaja dola vystupoŭcaŭ — rasijskija Z-hurty, praz hramadzianskuju pazicyju.
Tak, 25 lutaha 2022 hoda, paśla poŭnamaštabnaha ŭvarvańnia Rasii va Ukrainu, u sacsietkach hurta źjaviŭsia čorny kvadrat z podpisam: «Hrupa «Kino» suprać vajny. I zaŭsiody budzie suprać vajny». Praŭda, potym post adredahavali, napisaŭšy takija radki «Siarod źviazak u horle kamiakom ciaśnicca kryk. Ale nadyšła para, i tut užo kryčy — nie kryčy».
A 10 sakavika hurt apublikavaŭ post pra historyju antyvajennaj pieśni Viktara Coja «Biaźjadziernaja zona», napisanaj u 1984 hodzie. Jana dahetul uklučanaja ŭ kancertnuju prahramu hurta, piša starsaboutwar.in.ua. Vizualnym fonam dla hetaj pieśni vykarystoŭvajucca koleru nacyjanalnaha ściaha Ukrainy. Hety videašerah taksama prysutničaje i ŭ klipie:
Kali ž kazać pra hramadzianskuju pazicyju muzykaŭ hurtoŭ «Kipiełaŭ» i «KniaZz», to
adzin z zasnavalnikaŭ i pieršy vakalist rok-hurta «Aryja» Valeryj Kipiełaŭ padtrymaŭ anieksiju Kryma ŭ 2014 hodzie i zajaviŭ, što jamu «vielmi spadabaŭsia vystup Pucina, jaki skazaŭ, što Krym dla ŭsich, i adzinaje, što jon nikoli nie budzie banderaŭskim».
Taksama Kipiełaŭ adkryta padtrymlivaje poŭnamaštabnuju vajnu Rasii suprać Ukrainy. Tak, jaho aburyŭ vystup salista hurta «DDT» Juryja Šaŭčuka, u jakim jon niaŭchvalna adhuknŭsia pra Pucina i raskazaŭ, što takoje Radzima ŭ jahonym ŭjaŭleńni.
U piku jamu Kipiełaŭ skončyŭ adzin sa svaich kancertaŭ pramovaj, ščodra zapraŭlenaj prapahandysckimi łozunhami i frazaj «Pieramoha budzie za nami!»
U lipieni 2022-ha Kipiełaŭ daŭ kancert u vajskovym špitali pierad rashvardziejcami, paranienymi padčas vajny va Ukrainie. U mai 2023 hoda vystupiŭ na vajskovaj bazie ŭ Siryi.
Što tyčycca hurta «KniaZz», to jahony lidar Andrej Kniazieŭ letam 2022 hoda ŭziaŭ udzieł u zapisie patryjatyčnaj praŭładnaj pieśni «Ja zastajusia» jak adkaz usim tym, chto pakinuŭ Rasiju. 22 žniŭnia 2023 hoda muzyki hurta ŭdzielničali ŭ kancercie, pryśviečanym Dniu rasijskaha ściaha ŭ Łužnikach razam ź inšymi fanatami pucinskaha režymu.
Rok-fiestyval «Soncastajańnie» prachodzić u Pružanach z 28 pa 30 červienia. Na rok-fiestyvali vystupiać 16 rok-vykanaŭcaŭ i kalektyvaŭ. Bolšaść ź ich — rasijskija, za jakimi zamacavałasia reputacyja Z-rokieraŭ. Havorka pra hurty «Čiernyj kofie», «Čiž i Ko», «Braťja Hrim», «SieŕHa» i «Moralnyj Kodieks», załaty skład hurta «Park Hoŕkoho» (Alaksandr Maršał, Alaksiej Białoŭ, Alaksandr Janienkaŭ) i lidara kalektyva «Smysłovyje Hallucinacii» Siarhieja Babunca.
Usie hetyja vykanaŭcy padtrymlivajuć ahresiju Rasii ŭ dačynieńni da Ukrainy i aktyŭna śpiavajuć na Z-kancertach jak u Rasii, tak i na akupavanych terytoryjach Ukrainy.
Na Słavianskim bazary vystupić adna artystka z Ukrainy. Čamu ŭ Ani Łorak takaja pazicyja?
Armienija admoviłasia ad udziełu ŭ «Słavianskim bazary» ŭ Viciebsku
Na sioletnim «Słavianskim bazary» pakažuć biełaruskamoŭnaha «Hamleta». Ale stavić budzie rasiejec