U lipieni buduć sudzić byłych supracoŭnic Tut.by Volhu Łojka i Alenu Tałkačovu
Minski haradski sud 15 lipienia pačnie razhladać kryminalnuju spravu ŭ dačynieńni da byłych supracoŭnic partała Tut.by Volhi Łojka, Aleny Tałkačovaj i Kaciaryny Tkačenka. Pasiedžańnie źjaviłasia ŭ raskładzie sudoŭ, źviarnuŭ uvahu «Pozirk».
30.06.2024 / 18:46
Volha Łojka. Skrynšot: jutub-kanał TOK
Abvinavačvańnie pradjaŭlenaje pavodle čatyroch artykułaŭ Kryminalnaha kodeksa: č. 3 art. 130 (raspalvańnie inšaj sacyjalnaj varožaści i varažniečy), č. 2 art. 243 (u staroj redakcyi KK — uchileńnie ad vypłaty padatkaŭ), č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich), č. 3 art. 361 (zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy Biełarusi).
Vierahodna, sudovy praces budzie zavočnym, bo abvinavačanyja znachodziacca za miažoj.
Vieści praces pryznačanaja sudździa Valancina Ziańkievič.
10 krasavika 2023 hoda paviedamlałasia, što Minharsud aštrafavaŭ na 500 bazavych vieličyń (na toj momant 18 500 rubloŭ) kožnaha paručyciela Tałkačovaj i Łojki, jakija pakinuli Biełaruś.
Paručycielami Tałkačovaj źjaŭlalisia palitołah Jaŭhien Prejhierman i na toj momant deputat Pałaty pradstaŭnikoŭ Valeryj Varaniecki, Łojka — staršynia Respublikanskaha sajuza pramysłoŭcaŭ i pradprymalnikaŭ Alaksandr Šviec.
Paručycieli byli vyklikanyja ŭ sud na padstavie art. 134 Kryminalna-pracesualnaha kodeksa (paradak nakładańnia hrašovaha spahnańnia i zvarotu zakładu ŭ dachod dziaržavy). Rašeńni vyniesła zhadanaja Ziańkievič.
17 sakavika minułaha hoda jana pryhavaryła hałoŭreda Tut.by Marynu Zołatavu i hiendyrektara «TUT BAJ MIEDYJA» Ludmiłu Čekinu da 12 hadoŭ pazbaŭleńnia voli.
Inšyja abvinavačanyja — redaktarka palityka-ekanamičnaha błoka Łojka, žurnalistka Tałkačova i juryskonsult Tkačenka — na praces nie źjavilisia, bo paśla vyzvaleńnia z-pad varty pakinuli krainu. Jany byli abvieščanyja ŭ vyšuk.
Čekinaj, Zołatavaj, Łojka i Tałkačovaj pa spravie byli inkryminavanyja art. 243, art. 130, art. 361 KK. Tkačenka abvinavačvali pavodle art. 243 i 342 KK.
U kastryčniku 2022 hoda Zołatavu, Čekinu, Łojku i Tałkačovu KDB unios u pieralik asob, «datyčnych da terarystyčnaj dziejnaści».
Usiaho pa «spravie Tut.by» było zatrymana 15 čałaviek. Ź ciaham času ahulnaja kolkaść abvinavačanych skaraciłasia da piaci (Zołatava, Čekina, Łojka, Tałkačova, Tkačenka), paźniej pad vartaj zastałosia dva čałavieki (Zołatava i Čekina).