Padsankcyjnyja aŭto i hruzaviki ŭsio adno traplajuć u Biełaruś i Rasiju, ale jość niatanny niuans
Chutka miesiac, jak Litva praktyčna pierastała vypuskać u Biełaruś padsankcyjnyja ŭ Rasii aŭtamabili. Lehalna ekspartavać raskošnaje aŭto amal niemahčyma, ale heta nie aznačaje, što ludzi ź vialikimi hrašyma zastanucca biez premijalnych mašyn.
02.07.2024 / 08:40
Ilustracyjny zdymak. Fota: «Naša Niva»
Zapracavali novyja schiemy?
Jak paviedamlajuć litoŭskija ŚMI, u čas dvuchdzionnych pravierak na punktach propusku na miažy ź Biełaruśsiu byli zafiksavanyja sistematyčnyja parušeńni, jakija dapamahajuć abychodzić sankcyi ES suprać Rasii i Biełarusi.
Havorka idzie pra hruzaviki i luksavyja aŭto, jakija ŭ abychod sankcyj traplajuć ź Jeŭropy ŭ Rasiju.
Schiema pracuje davoli prosta. Hruzavy aŭtamabil nibyta vykonvaje mižnarodnuju pieravozku, ale ŭ krainu rehistracyi bolš nie viartajecca, a zastajecca na terytoryi JEAES, dzie vierahodniej za ŭsio razmytnivajecca i stavicca na ŭlik.
Takim ža čynam ź Jeŭropy traplajuć i luksavyja aŭto, vyvieźci jakija lehalna paśla 23 sakavika 2024 hoda stała składaniej, a z 4 červienia amal niemahčyma.
Aŭtamabili, daražejšyja za 50 tysiač jeŭra i z abjomam ruchavika bolšym za 1,9 litra, uvoziać u Biełaruś fizičnyja asoby, jakija pakidajuć aŭtamabil u nas i viartajucca ŭ Jeŭropu ŭžo bieź jaho.
Ilustracyjny zdymak. Fota: telehram-kanał t.me/belgranica
Takim čynam padsankcyjny aŭtamabil biez dadatkovych pieraškod traplaje ŭ Biełaruś, a dalej, kali treba, u Rasiju. Šeramu eksparcioru zastajecca tolki z časam viarnuć na radzimu dakumienty i numary, kab źniać taki aŭtamabil z uliku ŭ krainie rehistracyi, kali hetaha patrabuje zakon.
Nakolki heta papularnaja schiema?
Takaja schiema naŭrad ci budzie karystacca vialikaj papularnaściu ŭ pierahonščykaŭ. Bo vyviezieny takim čynam aŭtamabil abychodzicca daražej, pakolki niemahčyma viarnuć PDV, jaki ŭ krainach ES składaje kala 20% (19% u Hiermanii, 21% u Litvie, 23% u Polščy).
Reč u tym, što kali pierahonščyk kuplaje śviežaje aŭto ŭ ES dla ekspartu za miežy Jeŭrasajuza, jon abo adrazu apłačvaje aŭtamabil pa canie «nieta», abo kuplaje pa «bruta» i ŭžo paśla paćviardžeńnia vyvazu za miežy Jeŭrasajuza viartaje sumu, roŭnuju staŭcy PDV.
Prykład, jak adroźnivajucca ceny na BMW X5 z ulikam PDV. Fota: skrynšot z sajta mobile.de
Działkam daviadziecca zabyć na PDV
Ale takaja schiema ź viartańniem PDV abo kupli pa canie «nieta» pracuje tolki ŭ tym vypadku, kali ŭsio adbyvajecca pa zakonie.
Na taki aŭtamabil spačatku afarmlajuć ekspartnuju dekłaracyju na mytni ŭnutry krainy, a paśla na miažy pry vyjeździe ź ES. Pakolki aficyjna ekspartavać takija aŭto faktyčna niemahčyma, to pra lehalnyja schiemy i viartańnie PDV davodzicca zabyć.
Tym nie mienš, pry vialikim žadańni luby padsankcyjny aŭtamabil usio adno moža patrapić da kančatkovaha pakupnika. Adzinaje, što pa bolš vysokaj canie.
I kali dla kančatkovaha pakupnika takoha aŭto asnoŭnaja prablema — bolš vysoki košt, pradaviec moža atrymać vielizarnyja prablemy.
Ilustracyjny zdymak. Fota: «Naša Niva»
Šalonyja štrafy za abychod sankcyj
Tak, naprykład, u pačatku hoda ŭ łatvijskich ŚMI ŭžo źjaŭlałasia infarmacyja pra toje, jak biznes-łedzi z Ryhi pryciahnuli da adkaznaści za prodaž rasijaninu Bently koštam 112 552 jeŭra.
Pa faktury pakupnikom šykoŭnaha aŭto nibyta źjaŭlaŭsia hramadzianin Kyrhyzstana, a faktyčnym pakupnikom byŭ hramadzianin Rasii, jaki paśla vyvazu ź ES zarehistravaŭ aŭto ŭ Rasii na siabie.
U vyniku ryžski haradski sud nakłaŭ štraf u pamiery 62 000 jeŭra na pradprymalnicu i jašče 111 600 jeŭra na firmu.
Taksama niadaŭna paviedamlałasia pra vobšuki ŭ niamieckich aŭtadyleraŭ, jakich padazrajuć u prodažy aŭtamabilaŭ u Rasiju ŭ abychod sankcyj na miljony jeŭra.
«Padčas pieratrusaŭ śledčyja naviedali bolš za siem ofisaŭ i pryvatnych uładańniaŭ. Prakuratura padazraje, što ŭsiaho było ździejśniena 190 niezakonnych ekspartnych pastavak. Aŭtamabili pastaŭlalisia ŭ Kazachstan, Kyrhyzstan, Turcyju i Biełaruś, adkul ich pierapraŭlali ŭ Rasiju ŭ abychod sankcyj. Padčas pieratrusaŭ u aŭtadyleraŭ śledčyja vyjavili dokazy takich pastavak», — havaryłasia ŭ ŚMI.
Čamu biełaruskija ŭłady aścierahajucca zakryćcia miažy z Polščaj?