«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka
Sacyjalnaja mieniedžarka Darja Caryk aburyłasia tym, što na sajcie chutkaj humanitarnaj dapamohi niama ruskaj movy — tolki biełaruskaja i anhlijskaja. Jana paličyła heta palityčnaj zajavaj.
01.07.2024 / 21:34
Darja Caryk. Fota ź jaje fejsbuku
«Chutkaja humanitarnaja dapamoha» — heta ahulny sajt čatyroch inicyjatyŭ, jakija dapamahajuć represiravanym biełarusam («Bajsoł», «Bajchełp», «Kraina dla žyćcia» i «Dysident.baj»).
U svaim dopisie na fejsbuku Darja napisała:
— Što mianie vielmi zasmuciła i vyklikała prosta ahidu. Najaŭnaść palityčnaj zajavy na humanitarnaj inicyjatyvie, a mienavita — sajt dastupny ŭ biełaruskaj i anhlijskich viersijach tolki. Čamu heta mienavita palityčnaja zajava — tamu što heta techničnaja zadača na 10 chvilin.
Darja śćviardžaje, što takoje rašeńnie supiarečyć etycy i pryncypam humanitarnaj dapamohi. Bo dapamoha pavinna być maksimalna dastupnaj i siabroŭskaj dla svaich bienieficyjaraŭ, rodnaja mova jakich i ruskaja, i biełaruskaja.
Jana taksama kaža ab tym, što vyklučeńnie ruskaj movy skarocić aŭdytoryju praz ałharytmy pošuku Huhła i Jandeksa, što tearetyčna moža pieraškodzić ludziam znajści infarmacyju pra dapamohu.
Dziaŭčyna navat abvinavačvaje stvaralnikaŭ resursu ŭ bulinhu ruskamoŭnych biełarusaŭ.
Siarod arhumientaŭ, jakija pryvodzić Darja, jość i mierkavańnie jaje ananimnaha kachanaha mužčynu, jaki nibyta pryncypova nie čytaje publičnyja paviedamleńni ci naviny, kali jany napisanyja na biełaruskaj movie. I voś čym jon tłumačyć takuju pryncypovaść: «Kali heta niedastatkova važna, kab uklučyć ruskamoŭnych biełarusaŭ, to i mnie nie varta marnavać čas, kab ich čytać. I ja dastatkova stary, kab pamiatać, što z hetaj ža pryčyny — vyklučeńnie ruskamoŭnych biełarusaŭ — Paźniak nie damohsia padtrymki na vybarach, i pieramoh Łukašenku».
Skrynšot dopisa Darji ŭ fejsbuku
U kamientaryi pryjšoŭ suzasnavalnik «Bajchepł» Alaksiej Lavončyk i pacikaviŭsia, kali Darja apošni raz zmahałasia za biełaruskuju movu na sajtach, dzie jość tolki ruskaja i anhlijskaja.
Žurnalistka Janina Mielnikava ździviłasia:
— Ukrainskaja mova nie zaminaje nam dapamahać ukraincam, a biełaruskaja pavinna zaminać biełarusam dapamahać i atrymać dapamohu?
Redaktarka «Biełsata» Volha Jarochina napisała:
— Dziakujučy pastajannym listam u Huhł (i nie tolki), Huhł pačynaje hladzieć u bok biełaruskaj movy. Prynamsi stała mahčymym zrabić u huhł-ńjuz navinavy biełaruskamoŭny kanał. Miarkuju, heta supolnaja pieramoha biełaruskamoŭnych miedyja. … Mianie krychu začapiła, što biełaruskuju movu vy ličycie palityčnym kantekstam. Dziŭnaja zajava.
A voś Juryj Mielničak, zasnavalnik kartahrafičnaha servisu MAPS.ME, kampanii AIMATTER staŭ na bok Caryk. Jon navat pryśviaciŭ hetamu niekalki dopisaŭ na svajoj staroncy:
— Na žal, sajt inicyjatyvy nie padtrymlivaje ruskuju movu, jakoj karystajucca bolš za 70% biełarusaŭ. Heta važna, tamu što nie ŭsie biełarusy vałodajuć biełaruskaj, asabliva starejšaje pakaleńnie. Ja hatovy dapamahčy i/ci prafinansavać dadańnie ruskaj movy na sajt, kab uklučyć u atrymalnikaŭ padtrymki bolšuju kolkaść biełarusaŭ. Kali vy nie chočacie dadavać ruskuju movu, i/ci kali heta vaša palityčnaje rašeńnie, kali łaska, paviedamcie pra heta publična, kab ruskamoŭnyja biełarusy byli ŭ kursie.
Raniej Darja Caryk była dyrektarkaj «Hienoma» (arhanizacyi, jakaja zajmałasia dapamohaj ludziam z redkimi hienietyčnymi niejra-myšačnymi zachvorvańniami), a taksama siabroŭkaj praŭleńnia arhanizacyi «Radzisłava» (dapamahała žančynam i dzieciam, jakija stali achviarami chatniaha hvałtu).
U studzieni 2022 hodzie Darju zatrymlivali pa palityčnych matyvach i asudzili na 8 sutak aryštu. U chutkim časie jana źjechała ŭ Hiermaniju i pasialiłasia ŭ Bierlinie.
U sacyjalnych sietkach Darji paznačana, što jana pracuje nad teściravańniem prahramy, jakaja z dapamohaj štučnaha intelektu dapamahaje vyśvietlić dyjahnaz — pacyjentu treba paśladoŭna i razhornuta adkazvajučy na pytańni. Taksama Caryk zapuściła sajt, na jakim abiacaje abjadnoŭvać inviestaraŭ i zasnavalnikaŭ prajektaŭ. Darečy, na sajcie Darji vykarystoŭvajecca tolki adna mova — anhlijskaja.
Dyrektarka arhanizacyi «Hienom» Darja Caryk vyjšła na volu
Dyrektarku arhanizacyi «Hienom» Darju Caryk aryštavali na 8 sutak. Pieratrusy prajšli i ŭ jaje kaleh